Read Alur Zaburi 9 Bible Online

Zaburi 9 - Alur bible

Zaburi 9

¹Abifoyo Yehova kud adundena ceke; Abinyutho tic peri ceke ma wang’u ijo.

²Anyong’a binega man abilula ni kumi; Abiwero pak ni nyingi, E in i Ng’atu ma Malu Ngbir.

³Kinde ma judegina lokri cen, Gikier man ginyothri ni kum weng’i.

⁴Kum ii pido kum lembapoka para ku lembe para; Ibedo wi komker m’ibepoko ko lembe pwe.

⁵Ijuko thek, inyotho judubo; Ikabu nying’gi woko mi nja.

⁶Judegi gi thum, gibedo ni uvuru mi nja; Man adhura m’ing’ielo, Cil poi ma pigi de rwinyo.

⁷Ento Yehova bedo calu ubimo mi nja: Eyiko komker pare mi pokolembe;

⁸Ebipoko lembe mi ng’om ku bedopwe, Ebipoko lembe mi kodhidhanu atira.

⁹Yehova bibedo ni ot ma tek ma wiu ni ju ma jusendogi, Ot ma tek ma wiu i nindo mi can;

¹⁰Man ju m’ung’eyo nyingi gibiketho genogen migi i kumi; Kum in, Yehova, iweko ju m’uyenyi ngo.

¹¹Wer pak ni Yehova, m’ubedo i Sayuni: Wuyer tic pare i kind dhanu.

¹²Kum ng’atu m’uculo rimo epoi pigi; Wie wil ungo kum ywak mi jucan.

¹³Bed ku kisa i kuma, E Yehova; Nen masendi para ma ni kum ju m’udaga, In m’iting’a malu kud i dhugang’ mi tho;

¹⁴Kara anyuth pak peri ceke, I dhugang’ pa nya Sayuni Anyong’a binega i both peri.

¹⁵Thek gipodho piny i vur ma gikunyo gin: Tiendgi gigi moko i voi ma gikanu.

¹⁶Yehova ketho jung’eye, etimo lembapoka: Jumaku jadubo kum tic mi cinge gire. [Higaion. Sela.

¹⁷Jubiloko judubo i liel. En e thek ceke ma wigi wil kum Mungu.

¹⁸Kum wijo biwil kum jacanpiny mi nja ngo, Kadi genogen mi ju ma mol de birwinyo mi nja ngo.

¹⁹Ai, E Yehova; ng’atu moko kud usagre: Wek jupok lembe mi thek i weng’i.

²⁰Nyai lworo i igi, E Yehova: Wek thek ging’ei gigi nia gi dhanu kende. [Sela.