Read Alur Zaburi 90 Bible Online

Zaburi 90 - Alur bible

Zaburi 90

¹Rwoth, ibedo ni kabedo mwa Kum dhanum’utuk ceke.

²Ma fodi juwodho got ungo, Kadi ma fodi k’icwio ng’om ku piny de ngo, Ugambre rondo ku rondo, in i Mungu.

³Iloko dhanu ni nyoth, Man iwacu kumae, Wudwogi, wu nyithindho mi dhanu.

⁴Kum kud i weng’i rundi rubanga En e calu nyaworo kende kan ekadhu, Man calu kur mi diewor.

⁵Imologi calu pi m’upong’; gibedo calu nindo ma junindo: Kugweno gi calu lum m’udongo.

⁶Kugweno etwi, man edongo; Uthieno jujwere, man ener.

⁷Kum wathum ni kum ng’ecwiny peri, Man cwinywa ng’abre ni kum kwinyo peri.

⁸Iketho kier mwa i weng’i, Dubo mwa ma mung’ mung’ i der mi weng’i.

⁹Kum nindo mwa ceke kadhu ni kum kwinyo peri; Wadaru rundi mwa calu agamacwiny.

¹⁰Nindo mi rundi mwa gi pier abiro, Kadi ni kum tego rundi pier abora; Ento kuhaya migi tic mi muli ku can kende; Kum ecidho pio, man wacidho.

¹¹Ng’a m’ung’eyo tego mi ng’ecwiny peri, Man kwinyo peri calku lworo m’uromo kudi?

¹²Ponjwa kara wakwan nindo mwa ku meno, Kara wagam iwa adunde mi rieko.

¹³Dwogi, E Yehova; rokani? Man ilok cwinyi kum jutic peri.

¹⁴A yeng’wa kugweno ku mer mi bero peri, Kara anyong’a ku mutoro negwa i nindo mwa ceke.

¹⁵Keth anyong’a negwa calku nindo m’isendowa i ie, Man rundi ma waneno ie lem ma rac.

¹⁶Wek tic peri nyuthre ni jutic peri, Man dwong’ peri wi nyithindho migi.

¹⁷Man wek bero pa Rwoth Mungu mwa bed i wiwa; Man keth tic m’i cingwa cung i kumwa; Eyo, keth tic m’i cingwa cungi.