Read Alur Zaburi 94 Bible Online

Zaburi 94 - Alur bible

Zaburi 94

¹E Yehova, in i Mungu ma culokwor en e peri, In i Mungu ma culokwor en e peri, rieny.

²Tingri malu, in i japoklembe mi ng’om: Cul sukulia mi jukuhaya.

³Yehova, judubo bisagu rokani, Judubo bisagu rokani?

⁴Gilulo, giyero ku tingri: Jutimkier ceke giluli gigi.

⁵Gituro dhanu peri nziki nziki, E Yehova, Man gisendo aba peri.

⁶Ginego dhaku ma cware tho kud umondo, Man ginego kic.

⁷Man giwacu kumae, Yehova bineno ngo, Kadok Mungu pa Yakobo de biparu pire ngo.

⁸Iwu pid, wu ju ma cobo i kind dhanu; Man wu jukusegu, wubibedo riek awene?

⁹Ng’atu m’uguro ith, ebiwinjo ngo? Ng’atu m’utimo wang’, ebineno ngo?

¹⁰Ng’atu m’uponjo thek, ebijuko juk ungo, En e ng’atu m’uponjo dhanu ku ng’eyong’eci?

¹¹Yehova ng’eyo pidoic mi dhanu, Nia gi mananu.

¹²Mugisa ni ng’atu m’iponjo, E Yehova, M’iponje kud i cik peri;

¹³Kara imi ire yom i ceng’ mi ruvwa, Cil ma jutong’o ko vur ni judubo.

¹⁴Kum Yehova bibayu dhanu pare ngo, Kadok aba pare de ebikune ngo.

¹⁵Kum lembapoka bidwogo ba bedopwe; Man dhanu ceke m’atira i adunde bilube.

¹⁶Ng’a ma biai ira kum jutimraci? Ng’a ma bicungo ira kum jutim kieri?

¹⁷Dok Yehova kubedo jakonyna ngo, Kuno di ng’eyong’ec para ling’ pio.

¹⁸Kinde m’awacu kumae, Tienda kier; Mer mi bero peri jenga, E Yehova.

¹⁹I udul pidoic ma yor i ia Juk peri nyayu anyong’a i ng’eyong’ec para.

²⁰Komker mi dubo biribre kudi, Ma timo lembe ma rac ku ciki?

²¹Gicokri gigi karacelo kum ng’eyong’ec mi weg bedopwe, Man gipoko lembe rac kum rimo m’umbe dubo.

²²Ento Yehova bedo ot ma tek para ma wiu, Man Mungu para bedo ni cana mi kapondo para.

²³Man ekelo kier migi gigi i wigi, Man ebikabugi woko i dubo migi gigi; Yehova Mungu mwa bijigo wigi.