Read Alur Zaburi 96 Bible Online

Zaburi 96 - Alur bible

Zaburi 96

¹A wuwer wer ma nyen ni Yehova: Wuwer ni Yehova, ng’om ngung’.

²Wuwer ni Yehova, wumi mugisa ni nyinge; Wunyuth both pare ku ba rupiny ku ba rupiny.

³Wuyer pi dwong’ pare i kind thek, Tic pare ma wang’u ijo i kind kodhidhanu ceke.

⁴Kum Yehova e dwong’, man pak umake dit: Maku julwore ma sagu mungu ceke.

⁵Kum mungu ceke mi kodhidhanu gi gin moko ngo; Ento Yehova timo polo.

⁶Yung ku dwong’ ni i wang’e: Tego ku bero ni i kamaleng’ pare.

⁷Wumi ni Yehova, wu wat mi kodhi dhanu, Wumi dwong’ ku tego ni Yehova.

⁸Wumi ni Yehova dwong’ m’umaku nyinge: Wukel girathiera, man wumond i lelagang’ pare.

⁹A wurwo ni Yehova i bero mi leng’: Kumwu miel i wang’e, wu ng’om ngung’.

¹⁰Wuwac kind thek kumae, Yehova bimo: Ng’om bende cungo m’ecopo yengre ngo: Ebipoko lembe mi kodhidhanu pwe.

¹¹Wek anyong’a neg polo, man wek anyong’a neg ng’om; Wek nam uwoi, ku gin m’upong’ i ie de;

¹²Wek anyong’a neg podho, ku gin ceke ma ni i ie; Yedhi ceke m’i luli bilund wero ni anyong’a

¹³I wang’ Yehova; kum ebino, Ebino nipoko lembe mi ng’om; Ebipoko lembe mi ng’om ku bedopwe, Man kodhidhanu ku lemandha pare.