Read Alur Zaburi 97 Bible Online

Zaburi 97 - Alur bible

Zaburi 97

¹Yehova bimo; wek anyong’a neg ng’om; Wek anyong’a neg udul cula.

²Afuru ku mudho tieke gbur: Bedopwe ku pokolembe gi thepiny mi komker pare.

³Mac wotho i wang’e, Man ewang’u jusend pare kun ku kun.

⁴Lukoth pare caru ng’om: Ng’om uneno, man emiel.

⁵Gudi loi calu udok i wang’ Yehova, I wang’ Rwoth mi ng’om ngung’.

⁶Polo yero pi bedopwe pare, Kodhidhanu ceke gineno dwong’ pare.

⁷Wek lewic umak dhanu ceke ma rwo ni ayi gin m’acwia m’ang’ika. Ma giluli gigi kum mungu m’araga: Wurwo ire, wu mungu ceke.

⁸Sayuni winjo man anyong’a nege, Man anyong’a nego nyig Yuda, Kum lembapoka peri, E Yehova.

⁹Kum in, Yehova, ini malu hai wi ng’om ceke: Idodri malu wi mungu ceke.

¹⁰E wun ma wumaru Yehova, wudag dubo: Egwoko ng’eyong’ec mi jumaleng’ pare; Ebodhogi kud i cing’ judubo.

¹¹Jucoyo der ni ju ma pwe, Man anyong’a ni ju m’adundegi atira.

¹²Anyong’a negwu ni kum Yehova, wu ju ma pwe; Man wufoi nyinge ma leng’ mi poi.