Read Alur Zaburi 98 Bible Online

Zaburi 98 - Alur bible

Zaburi 98

¹A wuwer wer ma nyen ni Yehova; O Kum etimo gin ma wang’u ijo: Cinge ma yor acwic, man bote ma leng’, utimo both ire,

²Yehova ketho both pare ng’eire: Enyutho bedopwe pare ngbeng’ i wang’ thek.

³Epoi kum mer mi bero pare man bedo mandha pare yo ba ot mir Israel: Tung’ ng’om ceke gineno both pa Mungu mwa.

⁴Wutim badwal mir anyong’a ni Yehova, wu ng’om ngung’: Wukoki man wuwer ni anyong’a, eyo, wuwer pak.

⁵Wuwer pak ni Yehova kud adungu; Kud adungu man badwal mi zaburi.

⁶Kud agwara man badwal mir agwara ma tung’ Wutim badwal mir anyong’a i wang’ Ubimo, Yehova.

⁷Wek nam uwoi, ku gin m’upong’ i ie de; Ng’om, ku gin m’ubedo i ie;

⁸Wek pi m’upong’ uteng’ cing’gi; Wek gudi wer ni anyong’a karacelo

⁹wang’ Yehova; kum ebino nipoko lembe mi ng’om. Ebipoko lembe mi piny ku bedopwe, Man kodhidhanu ku lem m’atira.