Read Alur Lembrieko 1 Bible Online

Lembrieko 1 - Alur bible

Lembrieko 1

¹Lembrieko pa Suleman ma wod Daudi, m’ubimo mir Israel:

²Kara jung’ei rieko ku ponji; Kara jung’i lembe mi ng’eyothelembe;

³Kara jujol ponji mi giratima ma ber, I bedopwe man lembapoka ku lem m’atira;

⁴Kara umi pidoic ni ju ma cobo, Ni jalawobi ng’eyong’ec ku lurolembe:

⁵Kara jarieko winji, man emed ponjo lembe; Man kara won ng’eyothelembe utund kum lembapora ma cu

⁶Kara eng’ei lembrieko, man thelembene, Lembe mi jurieko, man wec migi ma via via.

⁷Lworo Yehova en e thekri mi ng’eyong’ec; Ento jukusegu cayu rieko ku ponji.

⁸Woda, winj ponji pa wuru, Man kud iwek ponji pa meru:

⁹Kum gibibedo ni ruko mi bero i wii, Man nyoro i ng’uti.

¹⁰Woda, tek judubo bidhi, Kud iyi.

¹¹Tek giwacu kumae, Wacidhu wakudu, Dong’ wakenu adhi ni rimo; Dong’ wakenu adhi ling’ ni ju m’umbe dubo ma lembe mbe i kindwa wakugi;

¹²Dong’ wamwonyugi ma kwo calu liel, Man bo, calu ju m’uloro piny i vur;

¹³Wabinwang’u piny ma pire tek ceke; Wabipong’o udi mwa kud ayeki;

¹⁴Ibigoyo gagi peri karacelo kudwa; Wan ceke wabibedo ku gbethe acel:

¹⁵Woda, ku wuwoth wukugi i yo: Cer tiendi kud i yo migi:

¹⁶Kum tiendgi ringo kum lem ma rac, E gitimo pio kara gicwir rimo.

¹⁷Kum juciko voi mananu I wang’ winyo moko:

¹⁸Man dhanu maeni kanu adhi ni rimbgi gigi; Gikanu adhi ling’ ni kwo migi gigi.

¹⁹Ku ba dhanu ceke ma ketho cwinygi hai kum kuloka yo migi bedo kumeni; Ekabu kwo migi gi ju ma gibedo ko.

²⁰Rieko kok ma tek i gengi; Eting’o dwande ka ma lac;

²¹Elwong’o i ka ma cu mi cokri; I ka mondo mi dhugang’, Eweco lem pare i adhura:

²²Wu ju ma cobo, wubimaru bedo cobo rokani? Man jucac bende anyong’a neggi i ie kum cac, Man jukusegu bidagu ie ng’eyong’eci?

²³Wulokru kum juk para: Nen, abikonjo tipo para i wiwu; Abiketho lembe para ng’eire iwu.

²⁴Kum alwong’o, man wukwero; Arieyo cinga, man ng’atu moko mbe m’upido pire;

²⁵Ento wuneno lembapora para ceke ni gin mananu, Man wuyio juk para ki ngo:

²⁶An bende abing’iero i ceng’ mi ruvwa mu; Abicayu kinde ma lworo mu wok;

²⁷Kinde ma lworo mu bino calu wavuvu, Man ruvwa mu bino calu vira; Kinde ma lem ma tek ku ndiba bino i wiwu.

²⁸Gibilund lwong’a, ento abiyi ngo; Gibiyenya kud amora, ento gibinwang’a ngo.

²⁹Kum gidagu ng’eyong’ec, Man gifoyo lworo Yehova ngo.

³⁰Giyio lembapora para ki ngo, Gicayu juk para ceke;

³¹Ka kumeno gibicamu nying’ piny mi yo migi gigi. Man gibiyeng’ ku lembapora migi gigi.

³²Kum corocen mi ju ma cobo binegogi, Man bedoyo ma swa mi jukusegu binyothogi.

³³Ento ng’atu ma tek uwinjo i bang’a bibedo museme Man ebibedo yo ma lworo mi lem ma rac umbe kude.