Read Alur Lembrieko 12 Bible Online

Lembrieko 12 - Alur bible

Lembrieko 12

¹Ng’atu ma tek umaru ponji nwang’u emaru ng’eyong’ec; Ento ng’atu m’udagu juk e calu yedi.

²Ng’atu ma ber binwang’u bero ba Yehova; Ento ebigonjo ng’atu ma won lembapora ma rac.

³Jubiketho dhanu cungo ngo ku dubo; Ento ulag ju ma pwe bikabre Ici ngo.

⁴Dhaku ma ber en e jamkermiwic ni cware; Ento ng’atu ma nyayu lewic en e calu top i cogone.

⁵Pidoic mi ju ma pwe en e pwe; Ento lembapora mi judubo en e abombi.

⁶Lembe pa jadubo en e kanu adhi ni rimo; Ento dhu ju m’atira bibodhogi.

⁷Jung’ielo judubo, man gimbe; Ento ot mi ju ma pwe bicungo.

⁸Jubifoyo dhanu calku rieko pare; Ento jubicayu ng’atu ma kit adundene mbe.

⁹Ng’atu ma juparu pire hai ungo, man jatic pare nuti, E ber ma sagu ng’atu ma yungre gire, man ma can kwen ni i kume.

¹⁰Ng’atu ma pwe ng’eyo bedo mi lim pare; Ento kisa ma ng’ic pa jadubo e rac.

¹¹Ng’atu m’ufuro podho pare ebibedo ku cemo dupa; Ento ng’atu m’ulubo tok ju ma kitgi mbe ng’eyothelembe pare mbe.

¹²Judubo yenyo voi mi dhanu ma rac; Ento ulag ju ma pwe cego nyinge.

¹³Uwic nuti ni ng’atu ma rac i kier mi dendhok; Ento ju ma pwe biwok woko kud i can.

¹⁴Cwiny dhanu bikwio ku bero ni kum nying’ mi dhoge; Man giratima mi cing’ dhanu jubiculo ire.

¹⁵Yo pa jakasegu atira i wang’e gire; Ento ng’atu ma riek winjo lembapora.

¹⁶Kwinyo pa jakasegu ng’eire pio; Ento ng’atu ma won pidoic umo lewic.

¹⁷Ng’atu ma weco lemandha nyutho bedopwe; Ento jamulembe mi ndra nyutho abombi.

¹⁸Gin moko nuti ma weco vur vur calu cob mi palamularu; Ento leb ng’atu ma riek en e leng’kum.

¹⁹Dendhok mi lemandha bicungo mi nja; Ento leb mi ndra en e mi kinde ma nyanok.

²⁰Abombi ni i adunde ju ma poro lem ma rac; Ento mutoro ni juporlembe mi kwiocwiny.

²¹Gin moko ma rac umbe ma binwang’u ng’atu ma pwe; Ento jadubo bipong’ ku lem ma rac.

²²Dendhok mi ndra en e ginmajudagu ni Yehova; Ento ju ma timo lemandha gin anyong’a pare.

²³Ng’atu ma won pidoic umo ng’eyong’ec; Ento adunde jukusegu yero lem ma kite mbe.

²⁴Cing’ ma kud amora bibimo; Ento jubiketho janyap the tic mi muli.

²⁵Pidoic ma i adunde ng’atu moko nure; Ento lembe ma ber nyayu mutoro i ie.

²⁶Ng’atu ma pwe telo wi jadhugola pare; Ento yo mi judubo ketho gikier.

²⁷Janyap vulo gin m’enwang’u i dwar ungo; Ento piny ma pire tek mi dhanu en e bedo kud amora.

²⁸Kwo ni i yo mi bedopwe; Man tho moko mbe i yoje.