Read Alur Lembrieko 14 Bible Online

Lembrieko 14 - Alur bible

Lembrieko 14

¹Ku ba mon ceke ma riek gomo ot pare; Ento ng’atu ma kite mbe rwombe ku cinge gire.

²Ng’atu ma wotho ku lembatira pare lworo Yehova; Ento ng’atu ma kite mbe i yo pare caye.

³Ukede mi kuhaya ni i dhu ng’atu ma kite mbe; Ento dendhu ju ma riek bigwokogi.

⁴Ka ma koni dhiang’ moko mbe i ie, i dero bedo nanu; Ento nyai ma dit en e ni kum tego mi koni dhiang’.

⁵Jamulembe mi bedo mandha bicwayu ndra ngo; Ento jamulembe mi ndra weco ndra.

⁶Jacac yenyo rieko, man enwang’e ngo; Ento ng’eyong’ec yot ni ng’atu ma won ng’eyothelembe.

⁷Ai woko kud i vut ng’atu ma kite mbe, Kum ibineno dendhok mi ng’eyong’ec ungo i bang’e.

⁸Rieko pa ng’atu ma won pidoic en e ng’eyo yo pare; Ento kasegu mi jukusegu en e abombi.

⁹Jukusegu ng’iero dubo; Ento bero pa Mungu nuti i kind ju m’atira.

¹⁰Adunde ng’eyo lem ma kec pare gire; Man jawirok ribre ngo ku mutoro pare,

¹¹Ot pa jadubo jubing’ielo; Ento hema pa ng’atu m’atira bibedo miero.

¹²Yo nuti ma nen atira i wang’ dhanu; Ento kajikne en e yo mi tho.

¹³Cil i ng’iero adunde bedo mi can; Man kajik mi ng’iero en e lem ma pek.

¹⁴Ng’atu ma eoro cen ku yo i adunde bipong’ ku yo pare gire; Man ng’atu ma ber lembe birome tung’ ku en gire.

¹⁵Ng’atu ma cobo yio lembe ceke kubang’e kubang’e; Ento won pidoic neno i woth pare cu.

¹⁶Ng’atu ma riek lworo nege, man eweko lem ma rac; Ento jakasegu jai gire, man ebedo ku genogen.

¹⁷Ng’atu ma ng’ecwiny make vur vur bitimo lem ma kite mbe; Man judagu japorlembe ma rac.

¹⁸Ju ma cobo ginwang’u lem kasegu ni musolu migi; Ento ju ma weg pidoic gamu jamkermiwic ku ng’eyong’ec.

¹⁹Judubo rum i wang’ jubero; Man judubo, dhugang’ mi ju ma pwe.

²⁰Jacan bedo adaga cil ni jadhugola pare ma dhe de; Ento jalonyo jurimbe dupa.

²¹Ng’atu m’ucayu jadhugola pare nwang’u edubo; Ento ng’atu ma ngisi nege kum jacan, en e jamutoro.

²²Ju ma poro dubo gikier ungo? Ento ldsa ku lemandha bibedo ni ju ma poro lem ma ber.

²³Kuloka nuti i tic mi muli ceke; Ento wec mi dendhok tundo kum canpiny kende.

²⁴Jamkermiwic mi jurieko en e lonyo migi; Ento lem ma kite mbe mi jukusegu en e lem ma kite mbe kende.

²⁵Jamulembe mandha bodho ng’eyong’ec; Ento ng’atu ma weco ndra nyayu abombi.

²⁶Genogen ma tek ni i lworo Yehova; Man nyithindho pare bibedo ku karingo.

²⁷Lworo Yehova en e kulo mi kwo, Kara ng’atu moko ai kud i uwic mi tho.

²⁸Dwong’ p’ubimo nuti ni kum udul dhanu; Ento nyoth pa jaditmawijo nuti ni kum can dhanu.

²⁹Ng’atu ma ng’ecwiny make pio ngo ng’eyothelembe pare dit; Ento ng’atu ma cwinye vur vur dodo lem ma kite mbe.

³⁰Adunde mi kwiocwiny en e kwo ni ring’kum; Ento kumira en e top mi cogo.

³¹Ng’atu m’utimo jacan rac nwang’u ecayu Jacwicne. Ento ng’atu ma kisa nege kum jacanpiny nwang’u eyunge.

³²Jujwigo jadubo ni kum timorac pare; Ento ju ma pwe kapondo migi nuti kinde m’etho.

³³Rieko bedo i adunde ng’atu ma ng’eyothelembe ni kude; Ento gin ma ni i jukusegu ng’eire.

³⁴Bedopwe dodo thek; Ento dubo en e cac ni kodhidhanu.

³⁵Bero p’ubimo ni yo ba jatic ma timo ku rieko; Ento kwinyo pare ni i kum ng’atu ma nyayu lewic.