Read Alur Lembrieko 17 Bible Online

Lembrieko 17 - Alur bible

Lembrieko 17

¹Kwen m’utal, karacelo ku kwiocwiny e ber, Sagu ot m’upong’ kud agba karacelo ku dhau.

²Jatic ma timo ku rieko bibimo wi wodo ma nyayu lewic, Man ebibedo ku makapiny i kind musolu mi utumego.

³Agulu mi dwoko piny leng’ en e pi mola ma tar, man uka pi mola ma kwar; Ento Yehova ponjo adunde.

⁴Jatimrac ketho cwinye kum dendhok ma rac; Man jandra leng’o ithe ba leb mir athube.

⁵Ng’atu ma tek poro ba jacan nwang’u ecayu Jacwicne; Man ng’atu ma anyong’a nege kum ruvwa ebibedo umbe send ungo.

⁶Nyithindho mi nyithindho en e jamkermiwic mi dongo; Man dwong’ mi nyithindho en e weggi.

⁷Wec ma ber hai maku jakasegu ngo; Dendhok mi ndra maku jaditmawijo ci ki ngo.

⁸Jamblembe en e calu kidi ma pire tek ni ng’atu m’ubedo kude; Ka ma tek elokre i ie, ebedo miero.

⁹Ng’atu ma umo wi kier nwang’u eyenyo mer; Ento ng’atu ma sembo lembe epoko kind jurimo ma cu.

¹⁰Juk mondo cu i ng’atu ma won ng’eyo thelembe Sagu goc dak i kum jakasegu.

¹¹Ng’atu ma rac yenyo ali kende; Ka kumeno jubioro jakwenda ma rac i kume.

¹²Tek wai ma juyaku nyithindhe rombo ku ng’atu moko e ber, Sagu rombo ma ku jakasegu ku kasegu pare.

¹³Ng’atu ma tek dwoko lembe ma rac pi lembe ma ber, Lembe ma rac biai i ot pare ngo.

¹⁴Thekri mi dhau en e calu wodho pi: Ka kumeno wek dhau ma fodi ali kuwok ungo.

¹⁵Ng’atu ma gonyo lembe ma wi jadubo, ku ng’atu ma gonjo ng’atu ma pwe, Nwang’u gin ario de gi ginmajudagu ni Yehova.

¹⁶Nedi welpiny ni i cing’ jakasegu m’eng’ieu ko rieko; Ma nwang’u ng’eyothelembe pare mbe?

¹⁷Jarimo bedo ku mer i nindo ceke; Man junyolo umego mi can.

¹⁸Ng’atu ma ng’eyothelembe mbe kude maku cing’, Man edoko mukwatu i vut jadhugola pare.

¹⁹Ng’atum’umarukiernwang’uemaruali; Ng’atu m’uting’o dhugang’ pare malu nwang’u eyenyo nyoth.

²⁰Ng’atu m’ubedo kud adunde mi gondri nwang’u gin moko ma ber ungo; Man ng’atu m’ubedo ku leb ma kite mbe podho i ruvwa.

²¹Ng’atu m’unyolo jakasegu etime ni can ire; Man won jakasegu mutoro pare mbe.

²²Adunde mi mutoro en e yath ma ber; Ento cwiny m’utur talu cogo.

²³Ng’atu ma jadubo jolo jamblembe kud i kor, Kara eroc yo mi pokolembe.

²⁴Rieko ni i wang’ ng’atu ma won ng’eyothelembe; Ento wang’ jakasegu ni i kajik mi ng’om.

²⁵Wodo ma jakasegu en e can ni won, Man en e gin ma kec ni min m’unyole.

²⁶Sendo weg bedopwe bende e ber ungo, Kadi goyo weg yung de kum lembe migi m’atira e ber ungo.

²⁷Ng’atu ma ciro lembe pare en e won ng’eyong’ec; Man ng’atu ma cwinye kwio en e won ng’eyothelembe.

²⁸Kadi jakasegu de, tek ebedo ling’, juwacu ya e riek; Kinde m’emio dendhoge, jukwane y a e won pidoic.