Read Alur Lembrieko 2 Bible Online

Lembrieko 2 - Alur bible

Lembrieko 2

¹Woda, tek ibijolo lembe para, Man ikan lembang’ola para i beng’i;

²Kara iketh ithi kum rieko Man iketh adundeni kum ng’eyothelembe;

³Eyo, tek iywak pi ng’iolembe, Man iting’ dwendi malu pi ng’eyothelembe;

⁴Tek iyenye calu mola ma tar, Man iyenye calu piny m’akana m’upondo:

⁵Ibuund ng’eyo lworo pa Yehova, Man ibinwang’u ng’eyong’ec pa Mungu.

⁶Kum Yehova mio rieko; Ng’eyong’ec ku ng’eyothelembe ai kud i dhoge:

⁷Ekanu rieko ma cu ni ju m’atira; En e ban ni ju ma wotho i bedocu;

⁸Kara egwok yo mi ng’ololembe ma pwe, Man egwok yo mi jumaleng’ pare.

⁹Ibilund ng’eyo bedopwe ku pokolembe, Man lembatira, eyo, ku ba yo ceke ma ber.

¹⁰Kum rieko bimondo i adundeni, Man ng’eyong’ec binyayu mutoro ii;

¹¹Lembapora bikuri; Ng’eyothelembe bigwoki:

¹²Kara ubodhi ni yo ma rac, Ni dhanu ma yero lem ma kite mbe;

¹³M’uweko yo m’atira, Kara giwoth i yo mi mudho;

¹⁴Ma anyong’a negogi kum timo rac, Man anyong’a negogi kum lem ma kite mbe pa jadubo;

¹⁵M’ugondre i yo migi, M’ukier de i yo migi:

¹⁶Kara ubodhi ni dhaku ma nyawirok, En e ni nyawirok ma nang’u lembe ku dhoge ma mit;

¹⁷Ma weko jarimbe mir aradu pare, Ma wie wil de kum lembariba pa Mungu pare:

¹⁸Kum ot pare lengre yo ba tho Man yo pare ba ju m’utho;

¹⁹Ng’atu moko mbe ma cidho i bang’e ma dwogo kendo, Kadok ba yo mi kwo de gitundo ngo;

²⁰Kara iwoth i yo mi dhanu ma ber, Man imok kum yo mi ju ma pwe.

²¹Kum ju m’atira bibedo i ng’om, Man ju ma cu bibedo i ie.

²²Ento judubo jubikabu woko kud i ng’om, Man weg abombi jubimugo woko kud i ie.