Read Alur Lembrieko 20 Bible Online

Lembrieko 20 - Alur bible

Lembrieko 20

¹Pigulok en e jacac, man giramadha ma lake tek en e yakni; Man ng’atu ma tek ulder kudo nwang’u e riek ungo.

²Ndiri ubimo en e calu rundo mir umvor: Ng’atu m’unyayu ng’ecwiny i ie nwang’u etimo kwo pare gire rac.

³Bedo cen ku piem en e yung mi dhanu; Ento jukusegu ceke bidhau kubang’gi kubang’gi.

⁴Janyap bifuro fur ungo ni kum nindo mi koyo; Ka kumeno ebikwayu akwaya i palacam, man ebibedo ku gin moko ngo.

⁵Lembapora ma i adunde dhanu en e calu pi ma thuth; Ento dhanu ma ng’eyothelembe ni kude biwodhe woko.

⁶Dhanu ma dit ceke ng’atuman biyero pi bedober pare gire; Ento ng’a ma copo nwang’u won bedo mandha?

⁷Ng’atu ma pwe ma wotho i bedocu pare, Nyithindho pare bedo jumugisa yo ng’eye.

⁸Ubimo ma bedo wi komker mi pokolembe Eketho lem ma rac ceke cen ku wang’e.

⁹Ng’a ma copo wacu kumae, Adwoko adundena leng’, An a leng’ ni dubo para?

¹⁰Jampor ma tung’ tung’ man mukero ma tung’ tung’, Gin ario de gi ginmajudagu ni Yehova cal cal.

¹¹Cil nyathin ketho jung’eye ni tic pare, Tek tic pare leng’, man tek en e atira.

¹²Ith ma winjo, man wang’ ma neno, Yehova timo gin ario de.

¹³Kud imar nindo, imaru tundo kum canpiny; Yab weng’i, man ibiyeng’ ku kwen.

¹⁴Jang’ieu wacu kumae, E rac, e rac; Ento kinde m’ecidho i yo pare, elund efoire.

¹⁵Mola ma kwar nuti, man kidi ma kwar mi ruko dupa; Ento dendhok mi ng’eyong’ec en e jambruko ma pire tek.

¹⁶Mak kendi pa ng’atu ma mukwatu pa jawirok; Man mak lembang’ola pare ma en e mukwatu pi dhaku ma nyawirok.

¹⁷Kwen mi ndra e mit ni dhanu; Ento yo ng’eye dhoge bipong’ ku kidi.

¹⁸Lembakeca kubang’e kubang’e cungo ku lembapora; Man tim lwiny ku rieko lembe.

¹⁹Ng’atu ma wotho calu jaganda tuco wi lembamung’a; Ka kumeno kud wuwoth ku ng’atu ma yabu dendhoge lac.

²⁰Ng’atu ma tek lamu won kadi min, Thala pare bitho i mudho ma bii.

²¹Junwang’u aba i amora ma kwong’a; Ento kajikne mugisane mbe.

²²Kud iwac kumae, Abiculo wang’ dubo: Kur Yehova, man ebileri.

²³Jampor ma tung’ tung’ en e ginmajudagu ni Yehova; Man jampor mi ndra e ber ungo.

²⁴Woth mi dhanu ni ba Yehova; Dhanu copo ng’eyo yo pare nenedi?

²⁵Wec ma vur vur kumae, En e leng’, en e uwic ni dhanu, Man penjo penji yo ng’ei lembang’ola.

²⁶Ubimo ma riek piedho judubo, Man eketho ukobre mi jampiedh ukadh i wigi.

²⁷Tipo pa dhanu en e thala pa Yehova, M’eyenyo ko gin ceke ma ni i ic.

²⁸Bedober ku lemandha gwoko ubimo; Man komker pare jengre kum bedober.

²⁹Dwong’ mir awobi en e tego migi; Man bero mi dhanu m’uti en e wie ma ju lwar.

³⁰Goc mi lero lwoko dubo; Man goc tundo yor i ic.