Read Alur Lembrieko 22 Bible Online

Lembrieko 22 - Alur bible

Lembrieko 22

¹Foyo nying’ ma ber e ber ma sagu lonyo ma dit, Man bero mi mer sagu mola ma tar ku mola ma kwar.

²Jalonyo ku jacan girombo karacelo: Yehova en e jacwigi ceke.

³Ng’atu ma won pidoic neno dubo, man epondo; Ento ju ma cobo kadhu, man gisendri pire.

⁴Sukulia mi bedomol man lworo Yehova En e lonyo, ku yung, man kwo.

⁵Ukudho kud uwic gini i yo mi ju ma kitgi mbe: Ng’atu ma gwoko ng’eyong’ec pare bibedo bor kugi.

⁶Ponj nyathin uwoth i yo m’umaku piny, Man cil m’eti ebiweke ngo.

⁷Jalonyo bimo wi jacan; Man jagam banja en e jatic ni jami banja.

⁸Ng’atu ma coyo kier bikayu ruvwa; Man dul mi kwinyo pare bijwik.

⁹Ng’atu ma wang’e ni woko mugisa bikwanye; Kum emio kwen pare moko ni jucan.

¹⁰Bai jacac cen, e dhau biai woko; Eyo, piem ku lewic bijwik.

¹¹Ng’atu m’umaru leng’ mir adunde, Ni kum bero mi dendhoge ubimo bibedo jarimbe.

¹²Wang’ Yehova gwoko ng’atu ma won ng’eyong’ec; Ento eng’ielo lembe pa ng’atu ma won aroi.

¹³Janyap wacu kumae, Umvor ni woko; Abitho i gengi.

¹⁴Dhu mon ma wi rok en e vur ma thuth; Ng’atu ma Yehova dage bipodho i ie.

¹⁵Lemkasegu bedo atwia i adunde nyathin; Ento ukede mi ponji birieme bor kude.

¹⁶Ng’atu ma vugo jacan kara unyai kuloka pare, Man ng’atu ma mio ni jalonyo, bitundo kum canpiny kende.

¹⁷Cik ithi, man iwinj lembe mi jurieko, Man iketh adundeni kum ng’eyong’ec para.

¹⁸Kum en e gin ma ber tek igwokogi yor i ii, Tek gicungo karacelo wi dendhogi.

¹⁹Kara genogen peri bed i Yehova, Aketh ging’eiri iri tin, ndhu iri.

²⁰Agoro iri gin ma ber hai ungo Mi lembapora ku ng’eyong’ec,

²¹Kara uketh ing’ei gin mandha mi lembe mi lemandha, Kara idok ku lembe mi lemandha ba ju m’uori?

²²Kud iyak jacan, kum en e jacan; Kadi won masendi de kud isende i dhugang’:

²³Kum Yehova bicungo kum lembe migi, Man ebinyotho kwo mi ju m’unyothogi.

²⁴Kud imak rimo ku jang’ecwiny; Man kud iwoth ku jakwinyo:

²⁵Imaru maku ng’eyo yo pare, Man inwang’ uwic ni ng’eyong’ec peri.

²⁶Kud ibed ng’atu ma kind ju ma maku cing’, Kadi kind ju ma gi mukwatu mi banja.

²⁷Tek ibedo ku gin moko ngo m’icul, Nedi emai kavuto peri kud i beng’i?

²⁸Kud ikab giranyutha ma con mi kieu, Ma kwaru peri giketho.

²⁹Ineno ng’atu moko ma won amora i tic pare? ebicungo i wang’ ju m’ubimo; Ebicungo i wang’ dhanu ma sai ungo.