Read Alur Lembrieko 23 Bible Online

Lembrieko 23 - Alur bible

Lembrieko 23

¹Kinde ma wubedo dhu cam wuku jabim, Par pi ng’atu ma ni i weng’i cu:

²Man iketh pala i ng’uti, Tek in i ng’atu ma jambo.

³Kud iyeny cemo ma mit pare; Kum gi cemo mir abombi.

⁴Kud isendri ku yenyo lonyo; Wek rieko peri giri.

⁵Ibiketho weng’i kum gin m’umbe? Kum lonyo timo bombgi gigi andha, Calu acur ma ringo yor i polo.

⁶Kud icam kwen pa ng’atu m’ubedo ku wang’e mi dubo, Kadok cemo pare ma mit de kud iyeny:

⁷Kum calu eparu yor i ie gire, e ebedo kumeca: Ewacu iri kumae, Cam man madhi; Ento adundene mbe i kumi.

⁸Cemo m’icuto ibing’ogo, Man lembe peri ma mit birwinyo iri.

⁹Kud iyer lembe i ith jakasegu; Kum ebicayu rieko mi lembe peri.

¹⁰Kud ikab giranyutha ma con kud i kieu; Man kud imond i podho mi kic:

¹¹Kum Jawar migi e tek; Ebicungo i kumgi i dhogi.

¹²Keth adundeni kum ponji, Man ithi kum lembe mi ng’eyong’ec.

¹³Kud icer ponji ni nyathin; Kum tek igoye kud ukede, ebitho ngo.

¹⁴Ibigoye kud ukede, Man ibibodho ng’eyong’ec pare ni liel.

¹⁵Woda, tek adundeni riek, Anyong’a binego adundena, ndhu para:

¹⁶Eyo, anyong’a binego adundena, Kinde ma dendhogi yero gin m’atira.

¹⁷Kumira kud uneg adundeni kum judubo; Ento bed i lworo pa Yehova ceng’ du:

¹⁸Kum sukulia nuti andha; Man genogen peri bikabre woko

¹⁹Woda, winji, man ibed riek, Man tel adundeni i yo.

²⁰Kud ibed kind andrej pigulok, Kind jucam ring’o ma jumbo:

²¹Kum ju ma andre ku jumbo gibitundo kum canpiny; Man rip rip bironyo dhanu kud uthir kendi.

²²Winj dwand wuru m’unyoli, Man kud icai meru kinde m’eti.

²³Ng’ieu lemandha, man kud iloke; Eyo, rieko, man ponji, ku ng’eyothelembe.

²⁴Anyong’a ma dit binego won ng’atu ma pwe; Man ng’atu m’unyolo nyathin ma riek bibedo ku mutoro ni kume.

²⁵Wek anyong’a neg wuru ku meru, Man wek anyong’a neg ng’atu m’unyoli.

²⁶Woda, mi adundeni ira; Man wek anyong’a neg weng’i i yo para.

²⁷Kum dhaku ma won asara en e ora ma thuth; Man dhaku ma nyawirok en e vur ma diny.

²⁸Eyo, ekanu adhi calu won ayeki, Man enyayu weg aroi i kind dhanu.

²⁹Ng’a ma won ang’abacwinyi? ng’a ma won cani? ng’a ma bedo ku dhau? Ng’a ma won ng’uri? ng’a m’ubedo ku lero ma there mbe? Ng’a ma wang’e bogre?

³⁰En e ju m’ugalu hai kum pigulok; En e ju ma ci yenyo ka pigulok m’ajeba.

³¹Kud inen pigulok kinde m’e kwar, Kinde m’ethuthni i kikombe, Kinde m’emwonjre lwe:

³²Ma cen ethung’o calu thwol, Man ethung’o calu uting’kwodo.

³³Weng’i bineno gin ma tung’, Man adundeni biyero gin ma kite mbe.

³⁴Eyo, ibibedo calu ng’atu m’uvuto i die nam, Kadi calu ng’atu m’uvuto wi usimbru combo.

³⁵Ibiwacu kumae, Gigoya, man etima nedi mbe; Gidhonga, man ang’eyo ngo: Abiceu awene? abiyenye asu kendo.