Read Alur Lembrieko 25 Bible Online

Lembrieko 25 - Alur bible

Lembrieko 25

¹Porolembe man Ponji pi Bedo Leng’ Maeni bende lembrieko pa Sul man, ma dhanu pa Hezekia, m’ubimo mi Yuda goro.

²Mung’o lembe en e dwong’ pa Mungu; Ento dwong’ mi ju m’ubimo en e koro i lembe.

³Calu polo ni malu hai, man ng’om ni piny hai, E adunde ju m’ubimo de yenjre ngo kumeca.

⁴Kab ceth mola ma tar woko, Man agulu wok ni jabodho:

⁵Kab judubo woko kud i wang’ ubimo, Man komker pare bicungo i bedopwe.

⁶Kud iyungri giri i wang’ ubimo, Man kud icung i ka ju ma dongo:

⁷Kum e ber tek juwacu iri kumae, Idh kue, Sagu ma tek jukethi piny i vut jaditmawijo, Ma weng’i neno.

⁸Kud icidh vur vur nikiedo, Imaru ng’eyo ngo gin m’itim i kajikne, Kinde ma jadhugola peri nyayu lewic i wii.

⁹Wucung kum lembe peri wuku jadhugola peri, Man kud ituc lembamung’a pa ng’atu mange;

¹⁰Ng’atu m’uwinje maru cei, Man lembe ma rac peri maru lokre cen ungo.

¹¹Lembe ma juyero kakare E calu nyingulam mi mola ma kwar i tic mi voi mi mola ma tar.

¹²Calu nzir mi mola ma kwar, man jambruko mi mola ma kwar ma leng’, E jajuk ma riek ubedo kumeno ni ith ma wor.

¹³Calu koyo mi pei i nindo mi palacam, E jakwenda mi bedo mandha bedo kumeno ni ju m’uore; Kum edwoko ng’eyongec ni judongo pare.

¹⁴Calu afuru ku yamu m’umbe koth, E ng’atu m’ulule gire kum giramia pare mi ndra bedo kumeno.

¹⁵Jabim lokre ni kum ciro cir ma hai, Man leb ma yom turo cogo.

¹⁶Inwang’u kici? cam m’uromi, Imaru yeng’ kudo, man ing’oge.

¹⁷Tiendi kud ubed thiri thiri i ot pa jadhugola peri, Emaru ol kudi, man edegi.

¹⁸Ng’atu ma jamulembe mi ndra kum wadi En e calu dwong’ mi yen, man palamularu, kud athero ma bith.

¹⁹Genogen ma kum ng’atu ma won bedo mandha ngo i nindo mi can E calu lak m’utur, man tielo m’uwil.

²⁰Calu ng’atu m’uwodho bongu i nindo mi koyo, man calu picwa wi awasi, Ng’atu ma wero wer ni adunde ma pek ubedo kumeno.

²¹Tek kec unego jadegini, mi ire kwen ecam; Man tek rieu nege, mi ire pi emadhi:

²²Kum ibicoko cukmac i wie, Man Yehova bimio sukulia iri.

²³Yamu ma yor ariwa ma malu kelo koth; E leb ma yero nying’ de kelo wang’ mi ng’ecwiny kumeca.

²⁴Bedo i gui ma wi ot e ber, Sagu bedo i ot ma lac karacelo ku dhaku ma jadhau.

²⁵Calu pi ma ng’ic ni ng’eyong’ec ma rieu nego, E rwonglembe ma ber m’uai i ng’om ma bor ubedo kumeca.

²⁶Calu kulo ma junyono, man kulo ma ju codho, Ng’atu ma pwe ma weko lembe wang’ jadubo bedo kumeca.

²⁷Camu kic hai ber ungo; E kumeni tek dhanu yenyo dwong’ igi gigi e rac.

²⁸Ng’atu ma cwinye ciro lembe ngo En e calu adhura m’utur ma gang’kidine mbe.