Read Alur Lembrieko 26 Bible Online

Lembrieko 26 - Alur bible

Lembrieko 26

¹Calu pei i nindo mi ceng’, man calu koth i nindo mi palacam, E kumeno yung umaku jakasegu ngo.

²Calu kira i woth pare, calu ugwelo i ringo pare, E kwong’ ma lembe mbe de wok ungo kumeca.

³Del pi riuni, gwang’ pi kana, Man dul pi ng’ei jukusegu.

⁴Kud ilok lembe ni jakasegu calku kasegu pare, Imaru bedo calkude.

⁵Lok lembe ni jakasegu calku kasegu pare, Emaru bedo riek i wang’e gire;

⁶Ng’atu m’uoro lembe ku cing’ jakasegu Nwang’u ethumo tiende gire woko, man emadhu lem ma rac.

⁷Tiend won abala lekele; Lembabola bedo kumeno i dhu jukusegu.

⁸Calu ng’atu m’utwio kidi i jungbe, Ng’atu ma mio yung ni jakasegu bedo kumeno.

⁹Calu ukudho ma cobo cing andrej kong’o, E lembabola bedo kumeno i dhu jukusegu.

¹⁰Calu won atum ma kilo gin ceke, E ng’atu ma lonyo jakasegu ku ng’atu ma lonyo ju m’ukadhu akadha de bedo kumeno.

¹¹Calu gwok ma dwogo ba ng’ok pare, E jakasegu ma timo kasegu pare kendo bedo kumeca.

¹²Ineno ng’atu moko riek i wang’e gire? Geno jakasegu sagu geno ng’atuca.

¹³Janyap wacu kumae, Umvor ni i yo; Umvor ni i gengi.

¹⁴Calu dhugola wire wi jamtwicne, E janyap lokre kumeca wi kavuto pare.

¹⁵Janyap umo cinge i tabu; Kele i dhoge kendo oie.

¹⁶Janyap riek i wang’e gire Sagu dhanu abiro ma wodho thelembe.

¹⁷Ng’atu m’ukadhu akadha, m’emondo de i dhau ma pare ngo, E calu ng’atu m’umaku gwok ku ithe.

¹⁸Calu abelu m’ubayu dhumac, Man athero, ku tho,

¹⁹Ng’atu ma bombo jadhugola pare bedo kumeca, Man ewacu kumae, Atimo tuko ngo?

²⁰Kum can yen mac tho; Man ka ma jayernying’ umbe i ie, dhau thum.

²¹Calu cuk ubedo ni bilo, man yen ni mac, E ng’atu m’umaru dhau ubedo kumeca kara edheth ali.

²²Lembe pa jayernying’ e calu cam ma mit, Man giloro piny i ic.

²³Dendhok ma kud amora man adunde ma rac Gi calu agulu mir ulobo ma jumwono ku ceth mola ma tar.

²⁴Ng’atu m’udagu elokre ku dendhoge; Ento ekanu abombi yor i ie:

²⁵Kinde m’eyero lembe ber, kud iyie; Kum ginmajudagu abiro ni i adundene:

²⁶Kadok adegi pare umbre kud abombi, Dubo pare binyuthre ngbeng’ i wang’ cokri.

²⁷Ng’atu ma tek utong’o vur bipodho i ie; Man ng’atu m’ung’ielo kidi, ebidwogo i wie.

²⁸Leb mi ndra dagu ju m’etimogi rac; Man dhok ma mit mananu rebo nyoth.