Read Alur Eklizia 3 Bible Online

Eklizia 3 - Alur bible

Eklizia 3

¹Kum gin ceke bedo ku nindone, man ku ba lembe ceke ma the polo bedo ku nindone:

²nindo mi nyol, man nindo mi tho; nindo mi pidho, man nindo mi fudho gin ma jupidho;

³nindo mi nek, man nindo mi cangu; nindo mi bamu, man nindo mi gomo;

⁴nindo mi ywak, man nindo mi ng’iero; nindo mi nduru, man nindo mi miel;

⁵nindo mi bayu kidi, man nindo mi coko kidi karacelo; nindo mi gwaku, man nindo mi weko gwak;

⁶nindo mi yenyo, man nindo mi rwinyo; nindo mi gwoko, man nindo mi bayu;

⁷nindo mi yeco, man nindo mi kwoc; nindo mi bedo ling’, man nindo mi weco;

⁸nindo mi maru, man nindo mi dagu; nindo mir ali, man nindo mi poto ng’om.

⁹Ng’atu ma timo gin m’emule i ie bedo ku kuloka ang’o?

¹⁰Aneno sendri ma Mungu mio ni wot dhanu kara gimuli kudo.

¹¹Etimo gin ceke ber i nindo pare: eketho ng’om i adundegi bende, ebedo kumeno kara dhanu kud ucop nwang’u tic ma Mungu timo ugambre i thangambere cil i kajikne.

¹²Ang’eyo nia gin moko mbe ma ber igi, ma sagu bedo kud anyong’a, man timo ber cil ma gibedo ko kwo.

¹³Man ke ku ba dhanu maku ng’atuman ucam man emadhi, man anyong’a nege kum gin ma ber i tic mi muli pare ceke, en e giramia ma Mungu mio.

¹⁴Ang’eyo nia, gin ma tek Mungu timo, en e mi nja: gin moko mbe ma copo medre i kume, kadi gin moko mbe de ma jucopo kabu kud i kume; man Mungu time, kara lworo neg dhanu i wang’e.

¹⁵Maeni ma nuti egamu bedo nuti con; man maeno ma bibedo nuti ma cen egamu bedo nuti con: man Mungu yenyo kendo maeni m’ukadhu woko.

¹⁶Man kendo aneno the ceng’, i ka pokolembe, nia dubo ni keca; man i ka bedopwe, nia dubo ni keca.

¹⁷Awacu i adundena kumae, Mungu bipoko lembe mi ju ma pwe ku judubo; kum nindo nuti keca mi lembe kubang’e kubang’e man mi tic kubang’e kubang’e.

¹⁸Awacu yor i adundena kumae, En e kum wot dhanu, kara Mungu mul igi, man kara ginen nia gin gigi gi calu yedi kende.

¹⁹Kum maeni ma wok kum wot dhanu ewok kum yedi; en e gin acel ma wok i kumgi: calu acel tho, e wadi de tho kumeca; eyo, gin ceke gibedo ku yuyo acel; man dhanu sagu yedi ngo: kum gin ceke ie nanu.

²⁰Kagi ceke gicidho i kar acel; kagi ceke giai bang’ utur, man kagi ceke gilokri bang’ utur kendo.

²¹Ng’a m’ung’eyo tipo mi dhanu, tek ecidho malu, man tipo mi yedi, tek ecidho piny i ng’omi?

²²Kum kumeno aneno nia gin moko ma ber m’usagu mbe, ma nia anyong’a neg dhanu kum tic pare; kum maeni en e makapiny pare: kum ng’a ma bidwoke kendo kara enen gin ma bibedo nuti yo ng’eye?