Read Alur Eklizia 6 Bible Online

Eklizia 6 - Alur bible

Eklizia 6

¹Lembe ma rac nuti m’aneno the ceng’, man e pek wi dhanu:

²ng’atu moko ma Mungu mio ire lonyo, ku piny, man yung ketho nia gin moko rem ungo ni ng’eyong’ec pare mi gin ceke m’eyenyo, ento Mungu mio ire tego ngo m’ecam ko kume moko, ento jakamange came en; maeni gin ma ie nanu, man en e tho ma rac.

³Tek ng’atu moko nyolo nyithindho dak, man ecamu ng’om rundi dupa, ketho nia nindo mi rundi pare gi dupa, ento ng’eyong’ec pare pong’ ungo ku gin ma ber, man ke juyike ngo; awacu nia ic m’udubre sage:

⁴kum ebino i gin ma ie nanu, man ecidho i mudho, man nying’ne umbre ku mudho;

⁵mange ke fodi eneno ceng’ ungo kadi ang’eya de; maeni bedo ku yom ma sagu wadi:

⁶eyo, kadok ecamu ng’om rundi rubanga wang’ ario, de anyong’a nege ngo kum gin ma ber, kagi ceke gicidho i kar acel ungo?

⁷Tic mi muli ceke mi dhanu en e mi dhoge, ento eyeng’ ungo.

⁸Kum kuloka ang’o ma jarieko bedo ko ma sagu jakasegu? kadi jacan ubedo kud ang’o, m’eng’eyo ko maram ewoth i wang’ ju ma kwo?

⁹Neno ku wang’ e ber sagu sendri kud awanya: maeni bende en e gin ma ie nanu man kethocwiny kum yamu.

¹⁰Gin ma tek ubedo nuti, nwang’u jucaku nyinge con; man eng’eire maram dhanu bedo ko; kadok ii ni ng’atu ma tek ma sage de copre ire ngo.

¹¹Kum gin dupa nuti ma nyayu gin ma ie nanu, dhanu nwang’u kuloka ang’o?

¹²Kum ng’a m’ung’eyo gin ma kulokane nuti ni dhanu i nindo mi camung’om pare, i nindo ceke mi camung’om pare ma ie nanu m’elalu calu tipopinyi? kum ng’a ma copo yero ni dhanu pi gin ma bilubo ng’eye the ceng’i?