Read Alur Eklizia 7 Bible Online

Eklizia 7 - Alur bible

Eklizia 7

¹Nying’ ma ber e ber ma sagu mo ma pire tek; man ceng’ mi tho sagu ceng’ mi nyol ni dhanu.

²Cidho i odywak e ber sagu cidho i ot mir agba: kum maeno en e kajik mi dhanu ceke; man ng’atu ma kwo biparu pire i adundene.

³Can e ber ma sagu ng’iero; kum can mi wang’ dwoko adunde ber ma sagu.

⁴Adunde jurieko ni i ot mi ywak ento adunde jukusegu ni i ot mi mutoro.

⁵Winjo juk mi jurieko e ber, sagu tek dhanu winjo wer mi jukusegu.

⁶Kum calu moc mir ukudho ther agulu, ng’iero pa jakasegu bedo kumeca: maeni bende en e gin ma ie nanu.

⁷Andha kuvuga dwoko jarieko ni jakasegu; man jamblembe nyotho ng’eyothelembe.

⁸Kajik mi lembe e ber ma sagu thekrine; man ng’atu ma bedo ku twiocwiny i cwinye e ber ma sagu ng’atu ma bedo ku kuhaya i cwinye.

⁹Ng’ecwiny kud umeki vur vur i cwinyi; kum ng’ecwiny bedo i kor jukusegu.

¹⁰Kud iwackumae, Ceng’ ma kwong’a bedo ber ma sagu maeni nedi? kum ipenjo pi maeni ku rieko ngo.

¹¹Rieko ber calu musolu; eyo, e ber dit ma sagu ni ju m’uneno ceng’.

¹²Kum rieko en e jamgwok, cil calu sente en e jamgwok; ento lembe ma ber hai mi ng’eyong’ec en e nia rieko gwoko kwo pa ng’atu m’ubedo kude.

¹³Par pi tic pa Mungu: kum ng’a ma copo tiro gin m’egondo?

¹⁴Anyong’a negi i ceng’ mi mierolembe, man i ceng’ mi can ii pid; eyo, Mungu timo acel i ng’et wadi karacelo, kara dhanu kud unwang’ gin moko ma bibedo yo ng’eye.

¹⁵Aneno maeni ceke i nindo para ma ie nanu: ng’atu ma pwe nuti ma rwinyo i bedopwe pare, man ng’atu ma jadubo nuti ma bedo hai i timorac pare.

¹⁶Kud ibed pwe ma sagu kakare; kadi kud idwokri riek ma sagu ma kakare: nedi inyothri giri?

¹⁷Kud ibed ng’atu ma rac hai, kadi kud ibed jakasegu: nedi itho ma fodi nindo peri kutundo ngo?

¹⁸E ber tek imaku maeni; eyo, kud ikab cingi bende kud i kume: kum ng’atu ma lworo Mungu biai i maeni ceke.

¹⁹Rieko en e tego ni jarieko ma sagu jubim apar ma ni i adhura.

²⁰Andha ng’atu ma pwe mbe i ng’om, ma timo ber, ma dubo de ngo.

²¹Man kendo kud icik ithi kum lembe ceke ma juyero, imaru winjo jatic peri lemi;

²²kum adundeni bende ng’eyo wang’ udul nia in giri ilamu jumange kumeca.

²³Gin maeni ceke aporo akoro ie ku rieko: awacu kumae, Abibedo riek; ento ebedo bor kuda.

²⁴Maeno ma nuti, eni bor man thuth apila; ng’a ma copo nwang’e?

²⁵Alokra, man adundena kethre mi ng’eyo man mi sayu man mi yenyo rieko ku thelembe mi piny, man mi ng’eyo nia dubo en e lem ma kite mbe, man nia lemkasegu en e abelu.

²⁶Man anwang’u gin ma kec ma sagu tho en e dhaku ma adundene en e uwic man voi, ma cinge de en e uno: ng’atu ma tek nyayu mutoro i Mungu biboth ni dhakune; ento ebimaku jadubo.

²⁷Nen, anwang’u maeni, Jayerlembe wacu, kan aporo piny acel wi wadi, kara anwang’ thelembe;

²⁸ma ng’eyong’ec para becikuyenyo, ento fodi anwang’u ngo: anwang’u ng’atu ma nico acel i kind dhanu rubanga; ento dhaku acel i kind maeni ceke anwang’u ngo.

²⁹Nen, maeni kende m’anwang’u: nia Mungu timo dhanu atira; ento giyenyo lembapora dupa.