Read Alur Eklizia 8 Bible Online

Eklizia 8 - Alur bible

Eklizia 8

¹Ng’a ma calu jarieko? man ng’a m’ung’eyo thelembe mi gin moko? Rieko mi dhanu ketho wang’e rieny, man tego mi wang’e lokre.

²Apoi, wor lembang’ola p’ubimo, man maeno ma mi kwong’ pa Mungu.

³Kud iai vur vur kud i wang’e; kud iceri wi gin ma rac: kum etimo gin ma tek nyayu mutoro i ie.

⁴Kum lembe p’ubimo bedo ku tego; man ng’a ma copo wacu ire kumae, Itimo ang’o?

⁵Ng’atu ma tek woro lembang’ola bing’eyo gin ma rac ungo; man adunde jarieko ng’eyo nindo ku lembapoka:

⁶Kum ku ba lembe ceke nindo ku lembapoka nuti; kum lem ma rac mi dhanu e dit i wie:

⁷kum eng’eyo ngo gin ma bibedo nuti: kum ng’a ma copo yero ire maram ebibedo ko?

⁸Ng’atu moko mbe m’ubedo ku tego wi tipo m’ecer ko tipo; kadok tego ma wi ceng’ mi tho de ebedo ko ngo; man weko jo mbe i lwiny: kadok dubo de bibodho ng’atu m’ukethre kum lube ngo.

⁹Maeni ceke aneno, man aketho adundena kum tic ceke kubang’e kubang’e m’utimbre the ceng’: nindo nuti ma ng’atu acel bedo ie ku tego kum wadi m’etime ko rac.

¹⁰Kum kumeno aneno juyiko dhanu ma rac, man gibino ba liel; man ju m’utimo atira giai woko ku ba kamaleng’, man wi jo wil pigi i adhura: maeni bende en e gin ma ie nanu.

¹¹Kum juketho lembapoka timbre pio kum lem ma rac ungo, ka kumeno adunde wot dhanu doko tek i igi mi timo dubo.

¹²Kadok jadubo dub lembe wang’ dak, man emed nindo pare, ento ang’eyo andha nia lembe bibedo ber ni ju ma lworo Mungu, ma lworo negogi i wang’e:

¹³ento lembe bibedo ber ungo ni jadubo, kadok nindo pare de ebimedo ngo, ma en e calu tipopiny; kum lworo nege ngo i wang’ Mungu.

¹⁴Gin ma ie nanu nuti m’utimbre i ng’om, nia ju ma pwe nuti ma lembe wok i kumgi calku tic mi judubo; kendo, judubo nuti ma lembe wok i kumgi calku tic mi ju ma pwe: awacu nia maeni bende en e gin ma ie nanu.

¹⁵Alund afoyo anyong’a, kum dhanu bedo ku gin ma ber ma sagu ngo the ceng’, ma sagu camu, ku madhu, man bedo kud anyong’a: kum maeno bibedo kude i tic mi muli pare i nindo ceke mi kwo pare ma Mungu mio ire the ceng’.

¹⁶Kinde m’aketho adundena kum ng’eyo rieko, man mi neno tic m’utimbre i ng’om (maram dhanu nindo ko ngo ku wang’gi kadok ku dieceng’ kadi ku diewor),

¹⁷alund aneno tic ceke pa Mungu, nia dhanu copo nwang’u tic m’utimbre the ceng’ ungo: kum kadok dhanu yenye kud amora, ento ebinwang’e ngo; eyo ma sagu, kadok jarieko wac nyo eng’eye, ento ebicopo nwang’e ngo.