Read Alur Wer Pa Suleman 1 Bible Online

Wer Pa Suleman 1 - Alur bible

Wer Pa Suleman 1

¹Wer mi wer, ma pa Suleman.

²Wek ecwi limba ku cwic mi dhoge; Kum mer peri e ber ma sagu pigulok.

³Mo peri ng’wi ng’ar; Nyingi calu mo ma jukonjo; Ka kumeno nyir ma ng’won gimeri.

⁴Peya; wabiringo i toki: Ubimo kela ikusika pare; Wabibedo ku mutoro man anyong’a binegowa ni kumi; Wabiweco pi mer peri ma sagu mi pigulok: Gimeri cu.

⁵An a col, ento kuma leng’, E wu nyig Yerusalem, Galu hema mi Kedar, Calu kusikabongu pa Suleman.

⁶Kud wunena, kum kuma bogre, Kum ceng’ uwang’a. Ng’ecwiny umaku wot ma i kuma; Gidwoka ni jakur podho mir ulok; Ento podho mir ulok para ma dhe agwoko ngo.

⁷Yer ira, E in ma ng’eyong’ec para maru, Ka m’ikwayu ie udul rombe peri, Ka m’iketho eyom ie dieceng’: Kum nedi abed calu ng’atu ma juumo ku bongu mi wang’ I ng’et udul rombe mi juwedu?

⁸Tek ing’eyo ngo, in ma kumi leng’ m’usagu i kind mon, Cidh i yo peri ku ba tiend udul rombe, Man ikwai nyithi diegi peri i ng’et hema mi jukwac.

⁹Apori, E jamerna, Ku riuni i magali pa Farao.

¹⁰Limbi ber ku yukwii m’akieda, Ng’uti ku thondh jambruko.

¹¹Wabitimo iri girakieda mi mola ma kwar Ku jamtwic mi mola ma tar.

¹²Kinde m’ubimo bedo dhu mesa pare, Girawira para wodho ng’wice ma ng’ar.

¹³Jamerna bedo ira calu lungu udok ma ng’wice ng’ar, M’uvuto i kind thuno para.

¹⁴Jamerna bedo ira calu njuru thiuboko I podho mir ulok mi En-gedi.

¹⁵Nen, kumi leng’, jamerna; Nen, kumi leng’; Weng’i calu wang’ akuru.

¹⁶Nen, kumi leng’, jamerna, eyo, mi mer: Kavuto mwa bende en e mir ayi lum.

¹⁷Riu mi ot mwa en e musonge, Yen m’akonja mwa de en e sipre.