Read Alur Wer Pa Suleman 4 Bible Online

Wer Pa Suleman 4 - Alur bible

Wer Pa Suleman 4

¹Nen, kumi leng’, jamerna; nen, kumi leng’; Weng’i calu akuru i ng’ei bongu mi wang’ peri. Yukwii calu udul diegi, M’uvuto yo ba got Gilead.

²Leki calu udul rombe ma junyaru ma nyen, M’uai i ka ma jujomogi i ie, Ma kubang’gi kubang’gi gibedo ku rut, Moko mbe i kindgi ma nyathin pare tho.

³Dendhogi calu thol ma kwar ngbo, Man wec peri ber. Thengi calu ng’et ulemo I ng’ei bongu mi wang’ peri.

⁴Ng’uti calu mbegi pa Daudi Ma jugomo mi jambali, Ma jung’abu thungu rubanga i kume, Ban ceke mi dhanu ma ratego.

⁵Thuno peri ario gi calu nyithi ruda ario Ma gi rut pa vong’ ruda, M’ucamu kind kura.

⁶Maram ceng’ doko ko ng’ic, man tipopiny rwinyo, Abicidho ba got mir udok ma ng’wice ng’ar, Man bang’ ungulu got mi mo ma ng’wice ng’ar.

⁷I ber ceke, jamerna; Man mulima mbe i kumi.

⁸Bin karacelo kuda kud i Lebanon, mugole para, Karacelo kuda kud i Lebanon: Nen ku i usimbru Amana, Ku wi usimbru Senir ku Hermon, Ku i kabedo mir umvor, Ku kum gudi mi ng’u.

⁹Idwoko adundena tek, nyamira, mugole para; Idwoko adundena tek ku weng’i acel, Ku nyoro acel m’i ng’uti.

¹⁰Merni ber mire, nyamira, mugole para! Mer peri ber ma sagu pigulok mire! Man ng’wic mo peri ber ma sagu kwond yath ma jwa jwa ceke mire!

¹¹Dendhogi, E mugole para, cwiro kic calu pedekic: Kic ku cak ni the lebi; Man ng’wic kendi peri calu ng’wic Lebanon.

¹²Nyamira, mugole para, en e podho ma jutwodo kume; Kulo m’atong’a ma juculo, kulo ma dhenyni ma jumwono.

¹³Nyithindhi gi podho yen mir ulemo, ku nying’ ma pire tek; Uboko ma jubogo ko lwet kud uboko ma ng’wice ng’ar,

¹⁴Mo ma ng’wice ng’ar ku gin ma jubogo ko piny, Ngasi kud apoka yen ma lim lim, ku yen ceke mi mo ma ng’wice ng’ar; Udok ma ng’wice ng’ar kud uboko ma ju thondhe, ku yath ma jwa jwa ma cu ceke.

¹⁵In i kulo m’i podho, Kulo m’atong’a mi pi mi kwo, Man pi ma mol m’uai i Lebanon.

¹⁶Ceu, E yamu ma yor ariwa ma malu; man ibin, in i yor ariwa ma piny; Kot wi podho para, kara iwodh yath ma jwa jwane woko. Wek jamerna bin i podho pare, Man ecam nyinge ma pire tek.