Read Alur Wer Pa Suleman 7 Bible Online

Wer Pa Suleman 7 - Alur bible

Wer Pa Suleman 7

¹Tiendi leng’ i wara m’athuma mire, E nya jaditmawijo! Bembi ma ngulu ngulu calu jambruko, Tic mi cing’ jabodho ma riek.

²Kumi calu bakuli ma ngulu ngulu, Ma pigulok m’ajeba thum ungo i ie: Ii calu ungu nganu Ma jutieko ku kura.

³Thunoni ario gi calu nyithi ruda ario Ma gi rut pa min ruda.

⁴Ng’uti calu mbegi mi lakliec; Weng’i de calu kut i Hecbon, Ng’et dhugang’ mi Bat-rabim; Umi calu mbegi mi Lebanon Ma neno yo ba Dameski.

⁵Wii calu Karmel i wii, Man yukwii mi wi calu uluga; Ubimo makre i thondhe.

⁶In i ber man mi mer mire ma, E jamerna, mir anyong’a!

⁷Kadongoni maeni calu thith, Man thunoni calu nzuru nyinge.

⁸Awacu kumae, Abiidho malu wi thith, Abimaku jange: Wek thunoni bed calu nzum nying ulok, Man ng’wic yuyo peri calu ulam,

⁹Man dhogi calu pigulok ma mit, Ma mwonjre lwe ni jamerna, M’uketho dendhu ju m’unindo weco.

¹⁰An a pa jamerna; Man yeny pare ni yor i bang’a.

¹¹Bin, jamerna, wek wawok woko podho; Wek wagonj i pacu.

¹²Wek waidh pir kugweno ba podho mir ulok; Wek wanen tek ulok ukudo, Man tek thiwe yepo, Man tek ulemo thiwo; Abimio iri mer para kuca.

¹³Nying uboko wodho ng’wice ma ng’ar; Kwond nying’ piny ceke ma pire tek ni dhugola mwa, ma nyen ku ma con, M’akanu malu piri, E jamerna.