Read Alur Isaya 10 Bible Online

Isaya 10 - Alur bible

Isaya 10

¹Can wi ju ma ng’olo lembang’ola mi gondri, man ni jugor ma goro lembang’ola ma kite mbe;

²kara ulok jacanpiny cen ni pokolembe, man kara ukwal ng’ol migi ba jucan mi dhanu para, kara mon ma coggi tho bed ayeki migi, man kara gidwok kic ni amaci migi!

³E wubitimo ang’o i ceng’ mi lieu, man i nyoth ma biai bon? wubiringo ba ng’a mi konyi? man wubiweko dwong’ mu kani?

⁴Gibigung’ piny kende the jukol, man gibipodho the ju ma junego. Kadok maeni ceke timbre ng’ecwiny pare lokre cen ungo, ento cinge rieire asu.

⁵E Jaascuri, in i uluth mi ng’ecwiny para, in i dul ma kwinyo para ni i cingi!

⁶Abiore kum thek m’ucido, man abimio ire ng’ol kum dhanu mi kwinyo para, kara emak ayeki, man emak amaci, man kara enyongi piny calu unzabu m’i gengi.

⁷Ento ekeco kumeno ngo, kadok adundene pido kumeno ngo; ento eni i adundene ya enyothi, man ekab thek woko ma nok ungo.

⁸Kum ewacu kumae, Judongomawijo para ceke gin ubimo ngo?

⁹Kalno calu Karkemic ungo? Hamath calu Arpad ungo? Samaria calu Dameski ngo?

¹⁰Calu cinga nwang’u ker mi mungu m’araga, ma ayi gin m’apaya migi sagu mi ju mi Yerusalem ku mi Samaria;

¹¹abitimo kum Yerusalem ungo ku mungu m’aragane, calu atimo kum Samaria ku mungu m’aragane?

¹²Kum kumeno ebitimbre, nia, kinde ma Rwoth utimo tic pare ceke wi got Sayuni man kum Yerusalem, e abisendo nying adunde ma tek mir ubimo mir Ascur, man dwong’ mi nen pare ma malu.

¹³Kum ewacu kumae, Ku tego m’i cinga atimo maeni, man ku rieko para; kum abedo ku ng’eyong’ec: man akabu kieu mi kodhidhanu, man ayaku piny m’akana migi, man calu jarukara ajwigo ju m’ujany wi komker piny:

¹⁴man cinga nwang’u lonyo mi kodhidhanu calu uthaj winyo; man calu ng’atu moko coko tong’gweno ma juweko, acoko ng’om ngung’ kumeca: man ng’atu moko mbe m’uting’o bomb, kadi m’ung’amu dhok, kadi m’ukok.

¹⁵Lei bilule gire kum ng’atu m’upayu kude pinyi? jamtic biyungre gire kum ng’atu m’uthumo kude pinyi? calu ma tek dul ubimo wi ju m’uting’e malu, calu ma tek uluth uting’ ng’atu moko malu ma en e yen ungo.

¹⁶Ka kumeno Rwoth, Yehova mir udul, bioro mok ma jumok ko kind jupare m’ucwe; man jubicwinyo wang’u ma calu wang’upiny mi mac the dwong’ pare.

¹⁷Man der mir Israel bibedo ni mac, man Ng’atu Maleng’ pare ni lebmac; e ebiwang’u man ebicamu ukudho pare kud ucok pare i ceng’ acel.

¹⁸E ebiwang’u dwong’ mi luli pare, man mi podho pare ma cek hai, ng’eyong’ec ku kum bende: man ebibedo calu kinde ma jayei abera voc.

¹⁹E dong yen mi luli pare bibedo nok, ketho nia nyathin copo goro welgi.

²⁰Man ebtimbre i ceng’ maeca, nia dong Israel m’udong’, ku ju m’uboth mi ot pa Yakobo, bijengri kendo ngo kum ng’atu m’ugoyogi, ento gibijengri kum Yehova, Ng’atu Maleng’ mir Israel, i lemandha.

²¹Donge m’udong’ bidwogo, en e dong Yakobo, ba Mungu ma Jatego.

²²Kum kadok dhanu peri, ma Israel, bedo calu kwio mi nam, donge kende e ma gibidwogo: jukeco nyoth, m’upong’ hau ku bedopwe.

²³Kum Rwoth, Yehova mir udul, bitimo kajik ma pong’, ma jukeco, i die ng’om ngung’.

²⁴Ka kumeno Rwoth, Yehova mir udul, uwacu kumae, E dhanu para m’ubedo i Sayuni lworo kud unegwu kum Jaascuri, kadok egoi ku dul, man eting’o uluth pare i kumi, calu kura Misiri.

²⁵Kum fodi nindo dong’ nyandwikili, e kwinyo bitimbre kakare i kumi, man ng’ecwiny para kum nyoth pare.

²⁶E Yehova mir udul bicwaku goc ma tek i kume, calu i nek mi Midian kum cana pa Oreb: man uluth pare bibedo wi nam, man ebiting’e malu calu kura mi Misiri.

²⁷Man ebitimbre i ceng’ maeca, nia ter pare biai ku wi goki, man mberembere pare kud i ng’uti, man mberemberene binyothre ni kum mio.

²⁸Ewok Aiath, ekadhu kud i Migron; eketho jambwoth pare malu i Mikmac;

²⁹gikadhu ku wi girakadha; gigonjo i Geba; kum Rama bemiel; Gibeya pa Saul uringo.

³⁰Kok ma tek ku dwendi, E nyar Galim! winji, E Laica! E in i Anathoth ma jacan!

³¹Madmena e jawoth; ju m’ubedo i Gebim giringo mi both.

³²Ceng’ maeni nini ebigalu i Nob: eyengo cinge wi got pa nya Sayuni, ungulu got mi Yerusalem.

³³Nen, Rwoth, Yehova mir udul, binuro jang ku ndiri: e jubing’olo ju ma boco piny, e jubijwigo ju m’utingri piny.

³⁴Man ebitong’o susu mi luli ku nyunyu, man Lebanon bipodho ku ng’atu ma jatego.