Read Alur Isaya 11 Bible Online

Isaya 11 - Alur bible

Isaya 11

¹Man giralotha biloth ku kum dund Yese, man jange m’uai i ulage bicego nyinge.

²Man Tipo pa Yehova bibedo i wie, tipo mi rieko man ng’eyong’ec, tipo mi lembapora ku tego, tipo mi ng’eyong’ec man mi lworo pa Yehova.

³Man anyong’a pare bibedo i lworo pa Yehova; man ebipoko lembe ngo calku nen mi wang’e, kadok ajuka de ebijuko ngo calku winjo m’i ithe;

⁴ento ebipoko lembe mi jucan ku bedopwe, man ebijuko ju ma mol m’i ng’om de ku bedopwe; e ebigoyo ng’om ku dul mi dhoge; man ebinego judubo ku yuyo mi dendhoge.

⁵Man bedopwe bibedo ni jamtwic mi ie, bedo mandha ke bibedo ni thondh piere.

⁶Man urudi bibedo karacelo ku nyathi rombo, man ng’u bivuto karacelo ku nyathi diel; man nyathi dhiang’ ku nyathin umvor man lim ma fulful de karacelo; e nyathin ma nyanok bipeyogi.

⁷Man min dhiang’ ku wai bicamu; man nyithindhgi bivuto karacelo, e umvor bicamu lum calu koni dhiang’.

⁸Man nyathin ma dhoth bituko wi odpino, man nyathin m’ukwiro cak biketho cinge dhu odbunyo.

⁹Gibitimo rac kadi nyotho de ngo kum got para ma leng’ ceke; kum ng’om bibedo pong’ ku ng’eyong’ec pa Yehova, calu pi umo ng’om.

¹⁰Man ebitimbre i ceng’ maeca, nia ulag Yese, m’ucungo ni abera ni kodhidhanu, thek biyenyo i bang’e; man kayom pare bibedo mi dwong’.

¹¹Man ebitimbre i ceng’ maeca, nia Rwoth biketho cinge kendo wang’ arionde kara egam dong’ dhanu pare, ma bidong’, kud i Ascur, man kud i Misiri, man kud i Pathroc, man kud i Kuc, man kud i Elam, man kud i Cinar, man kud i Hamath, man kud i cula mi nam.

¹²Man ebiting’o abera ni thek, e ebicoko ju ma juriemo mir Israel, man ebicoko ju ma julalugi mi Yuda kud i tung’ ng’om ang’wen.

¹³Nyeko pa Efraim bende biai, man jubikabu ju m’usendo Yuda woko: nyeko binego Efraim ungo kum Yuda, man Yuda bisendo Efraim ungo.

¹⁴Man gibikonjri piny wi gok Jufilisti yo reto; e gibinyotho nyithindho ma yo nyangu karacelo: gibirieyo cing’gi wi Edom ku Moab; man nyithindho mir Amon biworogi.

¹⁵Man Yehova binyotho leb nam mi Misiri kot; man ebileko cinge wi Kulo ku yamu ma wang’, e ebigoye ebipokre ni kulo abiro, man ebiketho dhanu kadhe ku tielo ku wi ng’om m’uthwo.

¹⁶E gengi bibedo nuti ni dong’ dhanu pare, ma bidong’, m’uai Ascur; calu ma yang’ ebedo ni Israel i ceng’ m’eidho ie malu kud i ng’om Misiri.