Read Alur Isaya 13 Bible Online

Isaya 13 - Alur bible

Isaya 13

¹Ewolembe ma pi Babeli, ma Isaya ma wod Amoz uneno.

²Wuketh abera wi got ma lelele, wuting’ dwal i bang’gi, wuwir cing’, kara gicidh i dhugang’ mi Weg yung.

³Ang’olo ni dhanu para ma jukoyogi, eyo, alwong’o dhanu para ma jutego mi ng’ecwiny para, en e dhanu para m’utingre ku kuhaya.

⁴Badwand udul kum gudi, calu mi dhanu dupa! badwal mi yakni mi ker mi thek m’ucokre karacelo! Yehova mir udul ujoko udul mir ali.

⁵Giai kud i ng’om ma bor, kud i ng’et polo ma wi tung’, en e Yehova, man jambali mi kwinyo pare, kara enyoth ng’om ngung’.

⁶Wugoi nduru; kum ceng’ pa Yehova ni ceng’ni; ebibino calu nyoth m’uai ba Jategokpo.

⁷Ka kumeno cing’ ceke binur, man adunde dhanu kubang’gi kubang’gi bing’oi:

⁸e cwinygi bing’abre; can ku masendi bimakugi; gibibedo i remokum calu dhaku m’ubenyol: gibinendri ku wang’gi ku wang’uic; wang’gi bibedo wang’ mi lebmac.

⁹Nen, ceng’ pa Yehova bino, ma kisa mbe kude, ku kwinyo man ng’ecwiny ma lake tek; kara edwok ng’om ni uvuru, man kara enyoth judubone kud i ie.

¹⁰Kum cero mi polo ku njurune birieny ungo; ceng’ bidoko col i woth pare, man dwi birienyo derne ngo.

¹¹Man abisendo ng’om kum dubone, man judubo kum kier migi: e abijigo tingri mi jukuhaya, man abiredho tingri mi jundiri.

¹²Abiketho dhanu bedo lam ma sagu mola ma kwar ma leng’, en e dhanu ma sagu mola ma kwar ma leng’ mir Ofir.

¹³Ka kumeno abiyengo polo, e ng’om biyengre kud i kakare, i kwinyo pa Yehova mir udul, man i ceng’ mi ng’ecwiny pare ma lake tek.

¹⁴Man ebitimbre, nia ku ba dhanu ku ba dhanu ng’atuman bilokre ba juthugi ma dhe, calu ruda ma juriemo, man calu rombe ma ng’atu moko mbe m’ucoko dhoggi, man ku ba dhanu ku ba dhanu ng’atuman biringo i ng’om ma thugi ma dhe.

¹⁵Man ku ba dhanu ceke ma junwang’ugi jubicobogi plu; man ku ba dhanu ceke ma jumaku bipodho ku palamularu.

¹⁶Mukere migi bende jubirwadu nziki nziki i wang’gi; udi migi jubiyaku, mon migi de jubidubo.

¹⁷Nen, abithubo Jumedi i kumgi, ma biparu pi mola ma tar ungo, man anyong’a binegogi ngo kum mola ma kwar.

¹⁸Man atum migi bituro awobi nziki nziki; man ngisi binegogi ngo kum nying’ mi ic; kisa binego wang’gi ngo kum nyithindho.

¹⁹Man Babeli, ma dwong’ mi ker, leng’ mi kuhaya mi Jukaldayo, bibedo calu Sodom ku Gomora kinde ma Mungu ng’ielogi.

²⁰Dhanu bibedo i ie ki ngo, kadok ugambre kum dhanum’utuk cil kum dhanum’utuk jubibedo i ie ngo: kadok Jaarabi de biguro hema kuca ngo; kadok jukwac de biketho udul rombe migi vuto keca ngo.

²¹Ento yedi mi langa bivuto keca; man udigi bipong’ ku giracwia ma rac; man udo bibedo kuca, e diegi mi thim bimiel kuca.

²²Man urudi biywak i udi ma tek migi, man utho i udi ma ber mi ker: e nindo pare dhingo ceng’ni, man ceng’ pare bimedre ngo.