Read Alur Isaya 14 Bible Online

Isaya 14 - Alur bible

Isaya 14

¹Kum kisa binego Yehova kum i Yakobo, e ebifoyo Israel kendo, man ebikethogi i ng’om migi ma dhe: e umondo biribre gire kugi, man gibimoko kum ot pa Yakobo.

²E kodhidhanu biting’ogi man gibidwokogi i kakagi; e ot mir Israel bibedo kugi i ng’om pa Yehova ni jutic man ni bong’: man gibidwokogi ni ng’eca ma naka gin e ma gi ng’eca migi; man gibibimo wi jusend migi.

³Man ebitimbre i ceng’ ma Yehova bimio iri yom i can peri man ni ang’abacwiny peri, man ni tic ma tek ma juketho itimo i ie,

⁴nia ibiting’o lembabola maeni kum ubimo mi Babeli, man ibiwacu kumae, Jasend ujik mire ma! adhura mi mola ma kwar ujik mire ma!

⁵Yehova turo jamjeng’ mi judubo, uluth ker mi jubim;

⁶m’ugoyo kodhidhanu ku kwinyo ku goc ma thiri thiri, m’ubimo thek ku ng’ecwiny, ku masendi ma ng’atu moko mbe ma cero.

⁷Ng’om ngung’ uyom, man ekwio: gimojo wer.

⁸Eyo, anyong’a nego yen sipre i kumi, man musonge mi Lebanon, giwacu kumae, Ugambre ma juredhi piny, jang’ol moko mbe m’uidho i kumwa.

⁹Juting’o liel ma piny kara uromb kudi i bino peri; ethubo ju m’utho iri, en e ju ma dongo ceke m’i ng’om; eting’o ju m’ubimo ceke mi thek ku wi komker migi.

¹⁰Kagi ceke gibiloko lembe man gibiwacu iri kumae, In bende idoko ng’ic calu wani? idoko calu wani?

¹¹Junyono kuhaya peri piny i liel, ku badwal mir usegu peri: ukoko moire i theri, man ukoko umi.

¹²Ipodho kud i polo, E cero mi dieceng’, wod kugweno mire ma! juredhi piny i ng’om, in ma naka iredho thek piny mire ma!

¹³Man iwacu yor i adundeni kumae, Abiidho i polo, abidodo komker para wi cero pa Mungu; man abijany wi got mir udul, i ng’et kajik ma yor ariwa ma malu;

¹⁴abiidho wi landu afuru; abikethra gira calu Ng’atu ma Malu Ngbir.

¹⁵Ento jubiredhi piny i liel, ba kajik mi ng’et vur.

¹⁶Ju m’uneni bitono wang’gi i kumi, gibiparu piri, gibiwacu kumae, Maeni en e ng’atu m’uyengo ng’omi, m’uyengo keri;

¹⁷m’udwoko ng’om calu langa, man m’ung’ielo adhurane; m’ugonyo jukol pare ngo ya gidok thugi?

¹⁸Ju m’ubimo ceke mi thek, kagi ceke, ginindo i dwong’, kubang’gi kubang’gi ng’atuman i ot pare ma dhe.

¹⁹Ento in jubei woko ku ba odliel peri calu jangyen ma judagu, calu kendi mi ju ma junego, ma jucobo plu ku palamularu, m’uloro piny ba kidi mi vur; calu avu ma junyono the tielo.

²⁰Ibiribri kugi i yik ungo, kum inyotho ng’om peri, inego dhanu peri; jubilwong’o nying’ kodhi mi jutim rac ungo mi nja.

²¹Wuyik nek ni nyithindho pare kum kier mi kwarugi, kara ku giai, gimwony ng’om de, man gipong’ wang’ ng’om kud adhura.

²²E abiai i kumgi, Yehova mir udul uwacu, man abikabu nying’ ku donge woko ku ba Babeli, man wod ku wod wod, Yehova wacu.

²³Abidwoke ni piny mi ceu, ku kut mi pi: man abiyweye kud uywic mi nyoth, Yehova mir udul uwacu.

²⁴Yehova mir udul ukwong’o kwong’, ewacu kumae, Andha, calu ia pido, ebitimbre kumeca; man calu akeco, ebicungo kumeca:

²⁵nia abituro Jaascuri i ng’om para, man abinyone the tielo wi gudi para: e mberembere pare bilund ai kud i kumgi, man ter pare biai kud i gokgi.

²⁶Maeni en e lembakeca ma jukeco wi ng’om ngung’; man maeni en e cing’ ma jurieyo wi thek ceke.

²⁷Kum Yehova mir udul ukeco, man ng’a ma bithire? man cinge rieire, e ng’a ma bidole?

²⁸I rundi m’ubimo ma Ahaz utho ewolembe maeni nuti.

²⁹Anyong’a kud unegi, E Filistia ceke, kum uluth m’ugoi tur; kum bunyo biwok kud i ulag thwol, man nyinge bibedo thwol mi mac ma ringo.

³⁰Man kayu pa jacan bicamu, man jacanpiny bivuto museme; e abinego ulegi ku ndru, man jubinego dongi m’udong’.

³¹Goi nduru, E dhugang’; ywaki, E adhura; ing’oi nwe, E Filistia ceke; kum yiro ai ku yor ariwa ma malu, man ng’atu m’udong’ cen umbe i piro pare.

³²Jubilund loko lembang’o ni jukwenda mi theki? Nia Yehova guro the Sayuni, man ju ma jusendo mi dhanu pare bipondo i ie.