Read Alur Isaya 18 Bible Online

Isaya 18 - Alur bible

Isaya 18

¹A, ng’om mi babomb, ma ni loka kulo Ethiopia;

²m’uoro kwenda ku yor i nam, en e i combo mi mutabi ku wi pi, m’uwacu kumae, Wucidhi, wu jukwenda ma pio, ba thek ma boco ma juruyir ungo, dhanu mi ndiri ugambre i thekri migi cil asu, thek ma juporo ku mukero ma junyono piny de, ma kulo poko ng’ombe mire!

³Wu dhanu ceke ma wubedo i ng’om, man wun umondo ma wi ng’om, kinde ma juting’o abera malu wi gudi, wunen; man kinde ma jukudho agwara, wuwinji.

⁴Kum Yehova wacu ira kumae, Abibedo ling’, man abineno ku i kabedo para, calu lietho m’ulero i derceng’, calu afuru mi thoi i lietho mi mwoka.

⁵Kum ma fodi mwoka kutundo ngo, kinde ma thiwe thum, man thiwe doko ni nyingulok m’ubecek, ebilwero jange ku pala mi lwer, man jange m’ubeloth ebikabu cen man ebitong’o piny.

⁶Jubiwekogi karacelo ni winyo ma kwiny mi gudi man ni yedi m’i ng’om; e winyo ma kwiny bibedo i wigi i nindo mi lietho, man yedi ceke m’i ng’om bibedo i wigi i nindo mi koyo.

⁷I nindo maeca jubitero giramia ni Yehova mir udul m’uai ba dhanu ma boco man ma juruyime ngo, en e ba dhanu mi ndiri ugambre i thekri migi cil asu, thek ma juporo ku mukero ma junyono piny de, ma ng’ombe kulo poko, jubitero ba ka mi nying’ Yehova mir udul, ba got Sayuni.