Read Alur Isaya 20 Bible Online

Isaya 20 - Alur bible

Isaya 20

¹I rundi ma Tartan ubino ba Acdod, kinde ma Sargon m’ubimo mir Ascur uore, man ekiedo kum Acdod emake de;

²i nindo maeca Yehova yero ku dhu Isaya ma wod Amoz, ewacu kumae, Cidhi, man igony gonia kud i pieri, man ikab wara peri kud i tiendi. E etimo kumeca, m’ewotho ko muneru ma tiende nanu.

³E Yehova wacu kumae, Calu jatic para ma Isaya wotho muneru man umbe wara rundi adek ni giranyutha ku musana pi Misiri man pir Ethiopia;

⁴e ubimo mir Ascur bicidho ku dhanu mi ng’eca mi Misiri kumeca, ku dhanu ma judaku mir Ethiopia, ju m’aradu ku ju m’uti, muneru man umbe wara, man ku thegi ma ngbeng’, ni lewic mi Misiri.

⁵E cwinygi biringo man cwinygi bing’abre, kum Ethiopia ma genogen migi, man kum Misiri ma dwong’ migi.

⁶Man ng’atu m’ubedo dhu wath maeni biwacu ceng’ maeca kumae, Nen, genogen mwa kumeni, ka ma waringo i ie mi kony kara jubodhwa ni ubimo mir Ascur: e wan, wabiboth nenedi?