Read Alur Isaya 21 Bible Online

Isaya 21 - Alur bible

Isaya 21

¹Ewolembe ma pi langa mi nam. Calu wavuvu ma yor ariwa ma piny ukadhu ma tek, eai kud i langa, kud i ng’om mi ndiri.

²Juyero ira pi ginmawokiwang’ ma rac; ng’atu ma won abombi timo kud abombi, man janyoth unyotho. Idh malu, E Elam; tiek kud ali, E Media; ajigo gamucwinyne ceke.

³Ka kumeno piera pong’ ku ndiba; remokum umaka, calu remokum pa dhaku m’ubenyol: remokum umaka ketho acopo winjo ngo; cwinya ng’abre ketho acopo neno ngo.

⁴Adundena miel, ndiri maka; piny ma doko tip tip m’ayenyo lokre ni mielkum ira.

⁵Giyiko mesa, giketho jukur, gicamu, gimadhu: wuai, wu judongomawijo, wuwir ban.

⁶Kum Rwoth uwacu ira kumae, Cidhi, keth jakur; wek eyer gin m’eneno:

⁷man kinde m’eneno udul, weg riuni ma ario ario, udul mi kana udul mi ngamia, ebiwinjo cu ku ketho cwiny dit.

⁸Man eywak calu umvor kumae: E Rwoth, acungo thiri thiri wi odkur ku dieceng’, man juketha i kakur para ku diewor soro;

⁹man, nen, njuru dhanu bino, weg riuni ma ario ario. Man eloko lembe ewacu kumae, Babeli podho, upodho; man ayi gin m’apaya ceke mi mungu pare tur i ng’om.

¹⁰E in girafoda para, man cam mi lela para mire! maeno m’awinjo ba Yehova mir udul, Mungu mir Israel, ayero iri.

¹¹Ewolembe ma pi Duma. Ng’atu moko Lwong’o i bang’a kud i Seir kumae, Jakwac, lembang’o mi diewori? Jakwac, lembang’o mi diewori?

¹²Jakwacne wacu kumae, Kugweno bino, man diewor bende; tek wubipenjo, wupenji; wulokru, wubin.

¹³Ewolembe ma wi Arabia. Wubigonjo i luli mir Arabia, E wu piro mi Judedani.

¹⁴Gikelo pi ba ng’atu ma rieu benege; ju m’ubedo i ng’om mi Tema ging’olo ju m’uringo ku kwen migi.

¹⁵Kum giringo ni palamularu, ni palamularu m’acika, man ni atum ma jugomo, man ni can mir ali.

¹⁶Kum Rwoth uwacu kumeni i bang’a, Ka fodi rundi kuthum ungo, calku rundi pa won sukulia, dwong’ ceke mi Kedar bijwik;

¹⁷man dong wel mi weg atum, dhanu ma jukero mi nyithindho mi Kedar, bidoko nok; kum Yehova, Mungu mir Israel, uyero maeni.