Read Alur Isaya 22 Bible Online

Isaya 22 - Alur bible

Isaya 22

¹Ewolembe mi poga mi ginmawokiwang’. Lembang’o m’utimi kawono, m’uketho iidho pet wi udi?

²E in m’ipong’ ku kok, adhura mi yakni, adhura mi mutoro; juperi ma junego junego ku palamularu ngo, kadok i ali de githo ngo.

³Jubim peri ceke giringo karacelo, weg atum jutwiogi; dhanu ceke ma junwang’u ma peri jutwiogi karacelo; giringo bor.

⁴Ka kumeno awacu kumae, Kud inen bang’a, abiywak ni can; kud isendri ku juka kum nyoth pa nya dhanu para.

⁵Kum en e ceng’ mi tagu, man mi nyonopiny, mir ang’abacwiny de, m’uai ba Rwoth, Yehova mir udul, i poga mi ginmawokiwang’; rwombri mi gang’kidi, man ywak ma ba gudi.

⁶Man Elam uyeyo tubu, karacelo ku magali mi dhanu man weg riuni; e Kir uyabu wi ban.

⁷Man etimbre, nia poga peri ma pire tek upong’ ku magali, man weg riuni thero gigi dhugang’.

⁸Man ekabu girauma pa Yuda; man i ceng’ maeca ineno ba jamtho i ot mi luli.

⁹E wuneno gin m’urwombre mir adhura pa Daudi, nia gi dupa; e wucoko pi mi kut ma yo piny karacelo;

¹⁰e wukwanu wel mi udi mi Yerusalem, man wurwombo udi piny kara wudwok gang’kidi tek;

¹¹man wutimo nam bende i kind gang’kidi ario mi pi mi kut ma con. Ento wuneno ba ng’atu m’utimo maeni ngo, kadi pi ng’atu m’ukece con de wuparu ngo.

¹²Man i ceng’ maeca Rwoth, Yehova mir udul, ulwong’o ywak ubed nuti, ku goyonduru, ku wie m’uwang’, man twic ma ku gonia:

¹³man, nen, anyong’a ku mutoro, kum nego koni dhiang’ ku nego rombe, kum camu ring’o ku madhu pigulok: Wek wacam wamadhi, kum urwo wabitho.

¹⁴Man Yehova mir udul unyuthre gire i itha kumae, Andha kier maeni jubiweko iwu ngo maram wutho ko, Rwoth, Yehova mir udul, uwacu.

¹⁵Rwoth, Yehova mir udul, uwacu kumae, Cidh ba jakanpiny maeni, en e ba Cebna, m’e jawiot, man iwac kumae,

¹⁶Itimo ang’o keni? man ibedo ku ng’a keni, ketho ipayu liel m’aroka iri keni? m’etong’o ire liel m’atong’a ku malu, m’ebeng’iko kabedo ire gire i cana!

¹⁷Nen, Yehova, calu ng’atu ma tek, bibei cen ma tek; eyo, ebiboi ki.

¹⁸Ebiboi kingli, man ebithori calu mupira i ng’om ma lac; e ibitho kuca, man magali mi dwong’ peri bibedo kuca, in i lewic mi ot pa rwoth peri.

¹⁹Man abikebi kud i kakeri; man jubiywei piny kud i kabedo peri.

²⁰Man ebitimbre i ceng’ maeca, nia abilwong’o jatic para ma Eliakim ma wod Hilkia:

²¹man abironye ku kanzu peri, e abidwoke tek ku thondh pieri, man abimio bim peri i cinge; e ebibedo wego ni ju m’ubedo i Yerusalem, man ni ot pa Yuda.

²²Man abiketho kifungula mi ot pa Daudi wi goke; man ebiyabu, e ng’atu moko mbe ma biciko; man ebiciko, e ng’atu moko mbe ma biyabu.

²³E abigure calu musumali i ka ma tek; man ebibedo ni komker mi dwong’ ni ot pa won.

²⁴E gibing’abu dwong’ mi ot pa won ceke i kume, nyithindho man kodhidhanu, agulu ma thindho kubang’e kubang’e, ugambre kum kikombe cil kud amorpi ceke.

²⁵I ceng’ maeca, Yehova mir udul uwacu, musumali ma juguro i ka ma tek bilokni; man jubitong’e piny, e ebipodho; man ter ma ni i wie jubikabu cen; kum Yehova yero maeni.