Read Alur Isaya 24 Bible Online

Isaya 24 - Alur bible

Isaya 24

¹Nen, Yehova dwoko ng’om muneru, man edwoke ni uvuru, man eloko wie piny, e elalu ju m’ubedo i ie mba mba.

²Man ebibedo, calu ku dhanu, e ku jalam de kumeca; calu ku jatic, e ku rwodhe de kumeca; calu ku bong’, e ku mege pagi de kumeca; calu ku jang’ieu piny, e ku jalok piny de kumeca; calu ku jami banja, e ku jagam banja de kumeca; calu ku jagam mukwatu, e ku jami mukwatu, ire de kumeca.

³Jubidwoko ng’om muneru ndem, e jubidwoke ni uvuru ti; kum Yehova yero lem maeni.

⁴Ng’om uywak man erwinyo woko, ng’om uvoc man erwinyo woko, ju ma dongo mi dhanu m’i ng’om givoc.

⁵Ng’om bende cido the ju m’ubedo i ie; kum gikadhu ku wi cik, gidubo lembang’ola, gituro lembariba mi nja.

⁶Ka kumeno kwong’ ucamu ng’om, e ju m’ubedo i ie junwang’u lembe ni i wigi: ka kumeno ju m’ubedo i ng’om uwang’, man dhanu ma lam e m’udong’.

⁷Pigulok ma nyasa ywak, ulok uvoc, ju ma anyong’a negogi ceke gigamu cwinygi.

⁸Mutoro mir umbukulumbu thum, badwal mi ju ma anyong’a negogi jik, mutoro mir adungu thum.

⁹Gibimadhu pigulok ku wer ungo; giramadha ma lake tek bibedo kec ni ju ma madhe.

¹⁰Adhura m’uvuru rwombre piny; ku ba udi ceke juciko, kara ng’atu moko kud umondi.

¹¹Ywak nuti i gengi kum pigulok; mutoro ceke cido, anyong’a m’i ng’om ucidho.

¹²Adhura dong’ ni uvuru, e jugoyo dhugang’ ku nyoth.

¹³Kum ebibedo kumeca i die ng’om i kind kodhidhanu, calu yeng mi yendulam, calu beko ulok kinde ma mwoka mir ulok uthum.

¹⁴Joni biting’o dwandgi malu, gibikok; kum dwong’ pa Yehova gikok ma tek kud i nam.

¹⁵Kum kumeno yung Yehova yo nyangu, cil nying’ Yehova, Mungu mir Israel, i cula mi nam.

¹⁶Ugambre i ng’et ng’om ma wi tung’ w a winjo wer kumae; Dwong’ ni weg bedopwe. Ento awacu kumae, An a jacan, an a jacan, can i wia mire! weg abombi gitimo kud abombi; eyo, weg abombi gitimo kud abombi ma dit.

¹⁷Lworo, ku vur, man uwic, gini i wii, E ng’atu m’ubedo i ng’om.

¹⁸Man ebitimbre, nia ng’atu m’upiei ni badwal mi lworo ebipodho i vur; man ng’atu m’uai malu kud i die vur jubimake i uwic: kum wang’ot ma malu bedo ayaba, man theng’om uyengre.

¹⁹Ng’om utur pet, ng’om ukak dra, ng’om uyengre gbe gbe.

²⁰Ng’om bimiel calu ng’atu m’umer ku kong’o, man ebiyengre calu voi; man gondrine bibedo pek i wie, e ebipodho, man ebiai kendo ngo.

²¹Man ebitimbre i ceng’ maeca, nia Yehova bisendo udul ju ma malu ma ni malu, man ju m’ubimo mi ng’om ma ni wi ng’om.

²²E jubicokogi karacelo, calu jucoko jukol i vur, man jubiciko bang’gi i odkol; e yo ng’ei nindo dupa jubiliewogi.

²³Cwiny dwi bilund ng’abre, man lewic bimaku ceng’: kum Yehova mir udul bicamu ker wi got Sayuni, man i Yerusalem; man dwong’ bibedo nuti wang’ judongo pare.