Read Alur Isaya 29 Bible Online

Isaya 29 - Alur bible

Isaya 29

¹Can i wii, Ariel, Ariel, adhura ma Daudi gonjo i ie mire ma! wumed rundi kum rundi; wuwek agba wok kakare:

²abilund sendo Ariel, e ywak ku goyonduru bibedo nuti; e ebibedo ira calu Ariel.

³E abigonjo i kumi gbur, man abitieki kud ali ku njuru asikari ma tek, man abigomo borna mir ali i kumi.

⁴E jubiredhi piny, man ibiweco kud i ng’om, e wec peri bibedo piny kud i utur; man dwendi bibedo calu ng’atu ma won tipo, kud i ng’om, man wec peri bibedo mung’ mung’ kud i utur.

⁵Ento udul judegini bibedo calu ng’ili utur, man udul jundiri calu cung’ ma kadhu woko: eyo, ebibedo i kinde ma nyagwil pio.

⁶Jubihewe ku mor polo ni kum Yehova mir udul, man ku digidi, ku badwal ma dit, man kud atido, man wavuvu, ku lebmac mi mac ma wang’u.

⁷E udul mi thek ceke m’ukiedo kum Ariel, en e dhanu ceke m’ukiedo i kume ku ka ma tek pare, man m’usende, gibibedo calu lek, en e ginmawokiwang’ mi diewor.

⁸Man ebibedo calu kinde ma ng’atu ma kec unege leko lek, man, nen, ecamu; ento eceu, e ng’eyong’ec pare bedo nanu: kadi kinde ma ng’atu ma rieu nege leko lek, man, nen, emadhu; ento eceu, man, nen, evoc, e kec unego ng’eyong’ec pare: e udul thek ceke bibedo kumeca, m’ukiedo kum got Sayuni.

⁹Wukur man iwu wang’ lii; wutim anyong’a mu man wubed abinga: gimer, ento ku pigulok ungo; gicidho ker ker, ento ku giramadha ma lake tek ungo.

¹⁰Kum Yehova konjo tipo mi nindo ma pek i kumwu, man eumo weng’wu, wu jubila; man eumo wiwu, wu jueulembe.

¹¹Man ginmawokiwang’ ceke doko iwu calu kitabu ma jumwono kud ayi, ma dhanu mio ni ng’atu m’ung’eyo lembagora, giwacu kumae, Akwei, som maeni; man ewacu kumae, Acopo ngo, kum jumwono ayi i kume:

¹²e jumio kitabune ni ng’atu ma sang’na, juwacu kumae, Som maeni, akwei; e ewacu kumae, Juponja ngo.

¹³E Rwoth uwacu kumae, Kum dhanu maeni eoro ceng’ni i vuta man giyunga ku dhoggi man ku dendhoggi, ento gicoro adundegi bor kuda, man lworo migi ma gilwora ko en e lembang’ola mi dhanu ma juponjogi ko;

¹⁴ka kumeno, nen, abibetimo tic ma wang’uijo i kind dhanu maeni, en e tic ma wang’uijo ku musana; e rieko mi jurieko migi birwinyo, man ng’eyong’ec mi dhanu migi ma riu bipandre.

¹⁵Can wi ju m’upanu lembapora migi thuth ni Yehova, man ma tic migi ni i mudho, m’uwacu de kumae, Ng’a m’unenowa? man ng’a m’ung’eyowa?

¹⁶Wuloko wi piny piny mire! Jubifoyo ulobo calu jacwiagulu; ma nia gin ma jucwio uwac ni ng’atu m’utime kumae, Icwia ngo; kadi gin ma jung’ino uwac ni ng’atu m’ung’ine kumae, Ng’eyong’ec pare mbe?

¹⁷En e nindo ma nyanok dit ungo, man jubidwoko Lebanon ni podho ma cek hai, podho ma cek hai ke jubiwacu ya luli?

¹⁸E i ceng’ maeca ju m’udhing’ biwinjo lembe mi kitabu, man ju ma abinga bineno kud i ka ma col man kud i mudho.

¹⁹Ju ma mol bende binyayu mutoro migi i Yehova, man anyong’a binego jucan ma kind dhanu ni kum Ng’atu Maleng’ mir Israel.

²⁰Kum judwoko ng’atu mi ndiri ni gin mananu, e jacac uthum, man jukabu dhanu ceke m’ukio kier cen;

²¹ma dwoko dhanu ni jadubo i lembe pare, man ma ketho uwic ni ng’atu m’ujuko i dhugang’ de, man ma loko won bedopwe cen ku gin mananu.

²²Ka kumeno Yehova wacu kumae, m’uwaru Ibrahim, pi ot pa Yakobo: Kawono lewic binego Yakobo ngo, kadok wang’e de bilokre kawono ngo.

²³Ento kinde m’eneno nyithindhe, ma tic mi cinga, i kinde, e gibidwoko nyinga leng’; eyo, gibidwoko Ng’atu Maleng’ pa Yakobo leng’, man gibilworo Mungu mir Israel.

²⁴Ju m’ukier i tipo bende gibitundo ba ng’eyong’ec, man ju m’ung’ur bijolo ponji.