Read Alur Isaya 31 Bible Online

Isaya 31 - Alur bible

Isaya 31

¹Can wi ju m’uloro piny i Misiri pi kony, man m’ugeno riuni, m’ugeno magali de kum gi dupa, ku weg riuni kum gi tek hai, ento gineno ba Ng’atu Maleng’ mir Israel ungo, kadok Yehova de giyenyo ngo!

²Ento en bende e riek, man ebikelo lembe ma rac, man ebigamu lembe pare kendo ngo, ento ebiai kum ot mi jutimrac, man kum kony mi ju m’utimo kier.

³Nie Jumisiri gi dhanu, Mungu re ngo; riuni migi de ring’kum tipo de ngo: man kinde ma Yehova birieyo cinge, e ng’atu m’ukonyo bikier, man ng’atu ma jubekonyo bipodho, e gin ceke gibinyothri karacelo.

⁴Kum Yehova wacu ira kumae, Calu umvor ku nyathin umvor twak wi ayeki pare, tek julwong’o udul jukwac i kume, cwinye bing’abre ngo kum dwandgi, kadi ebijwigre gire de ngo ni kum badwandgi; e Yehova mir udul biloro piny kara ekied wi got Sayuni kumeca, man wi ungulu gode.

⁵Calu winyo m’uberiebri wi udigi, e Yehova mir udul bigwoko Yerusalem kumeca; ebigwoke man ebibodhe, ebikadhu i wie man ebigwoke.

⁶Wulokru ba ng’atu ma wujai dit ire, E nyithindho mir Israel.

⁷Kum i ceng’ maeca ku ba dhanu ku ba dhanu ng’atuman bibayu mungu m’araga mi mola ma tar pare, ku mungu m’araga pare mi mola ma kwar, ma cingwu giwu timo iwu ni dubo.

⁸E Jaascuri bipodho ku palamularu, mi dhanu ngo; e palamularu, ma mi dhanu ngo, binyothe; e ebiringo palamularu, man awobi pare jubiketho kum tic mi olo.

⁹E cana pare bikadhu woko ni kum ndiri, man cwiny judongomawijo pare bing’abre ni kum abera, Yehova wacu, ma mac pare ni i Sayuni, man uka pare ni i Yerusalem.