Read Alur Isaya 33 Bible Online

Isaya 33 - Alur bible

Isaya 33

¹Can i wii in i ng’atu m’inyotho, man junyothi ngo; man m’itimo kud abombi, e gitimo kud abombi i kumi ngo! Kinde m’idaru nyotho, e jubinyothi; man kinde m’idaru timo kud abombi, gibitimo kud abombi i kumi.

²E Yehova, bed ku bero i kumwa; wakuri: bed bot mwa ku ba rupiny ku ba rupiny, both mwa bende i nindo mir ang’abacwiny.

³Ni kum badwal mi yakni kodhidhanu ringo; thek ulal ni kum dodri peri.

⁴Man jubicoko ayeki mu calu ukoko coko: calu bonyo por e dhanu bipor i wie kumeca.

⁵Yehova dodre; kum ebedo malu: epong’o Sayuni ku pokolembe man bedopwe.

⁶Man jamjeng’ bibedo nuti i nindo peri, en e dit mi both, ku rieko, man ng’eyong’ec: lworo Yehova en e piny m’akana peri.

⁷Nen, jurukara migi ywak yo woko; jukwenda mi kwiocwiny uywak ku can.

⁸Gengi bedo ni uvuru, ng’atu ma jawoth ujik: jadegi turo lembariba, ecayu adhura, eparu pi dhanu ngo.

⁹Ng’om uywak man evoc; lewic umaku Lebanon man ener woko; Caron calu ng’omngele; man Bacan ku Karmel giteng’o ithgi.

¹⁰Kawono abiai, Yehova wacu; kawono abitingra; kawono abidodra.

¹¹Wubigamu cung’ ni ic, wubinyolo soka: yuyo mu en e mac ma biwang’uwu.

¹²Man kodhidhanu bibedo calu wang’ ma juwang’u ko kidi ma tar, calu ukudho ma jutong’o piny, ma juwang’u i mac.

¹³Wuwinji, wun ma wuni bor, gin m’atimo; man, wmi ma wuni ceng’ni, wutuc tegona.

¹⁴Lworo nego judubo m’i Sayuni; mielkum umaku ju ma ayi Mungu mbe i kumgi: Ng’a m’i kindwa copo bedo ku mac ma wang’i? ng’a m’i kindwa ma copo bedo ku gin ma wang’ nja?

¹⁵Ng’atu ma wotho pwe, man ma weco atira; ng’atu m’udagu kuloka mi kuvuga, m’ukiro cinge kum gamu jamng’om, m’uculo ith kum winjo pi rimo, m’umio wang’e de kum neno wi dubo:

¹⁶ebibedo malu; kagwok pare bibedo odcana; jubimio ire kwen pare; pi pare bibedo mandha.

¹⁷Weng’i bineno ubimo i bero pare: gibineno ng’om ma kalacne bor.

¹⁸Cwinyi bipido pi ndiri: ng’atu m’ukwanu eni kani, ng’atu m’uporo ajok eni kani? ng’atu m’ukwanu odkur ni kani?

¹⁹Ibineno dhanu ma kwiny ungo, dhanu mi wec ma thuth m’icopo winjo ngo, mi leb ma tung’ m’icopo ng’eyo ngo.

²⁰Nen wi Sayuni, adhura mir agba mwa ma juketho: weng’i bineno Yerusalem kabedo ma yo, hema ma jubidaku ngo, ma gutene jubifudho ki ngo, kadok thondhe moko de jubicodo ngo.

²¹Ento Yehova bibedo karacelo kudwa i dwong’ kuca, en e ka mi kulo ma lac man kulo ma nok, ka ma yei mi jukol bicidho i ie ngo kud upol, kadok combo de bikadhu kud i kume ngo.

²²Kum Yehova en e japoklembe mwa, Yehova en e jamicik mwa, Yehova en e ubimo mwa; ebibodhowa.

²³Thol peri gony; gicopo twio tiend mbegi migi ngo gicopo yabu bongu mi combo ngo: amaci mir ayeki ma dit julund jupoko; weg abala maku amacine.

²⁴Man ng’atu m’ubedo i ie biwacu ngo kumae, Kuma lith: jubiweko kier mi dhanu m’ubedo i ie.