Read Alur Isaya 35 Bible Online

Isaya 35 - Alur bible

Isaya 35

¹Langa ku ng’om m’uthwo bibedo ku mutoro; anyong’a binego ng’om ngele, man ebithiwo calu thiuboko ma kume ju ukudho.

²Ebithiwo dit, man anyong’a binege cil ku mutoro man wer; jubimio ire dwong’ mi Lebanon, dwong’ mi Karmel ku Caron: gibineno dwong’ pa Yehova, dwong’ pa Mungu mwa.

³Wumi tego ni cing’ ma ng’ic, man wudwok cong’ ma lebelebe tek.

⁴Wuwac ni ju ma lworo nego adundegi kumae, Wubed tek, lworo kud unegwu: nen, Mungu mu bibino ku culokwor, ku culo wang’ lembe pa Mungu; ebibino man ebilaruwu.

⁵E wang’ abinga bilund yabre, man ith udhing’ bilund yabre.

⁶Jarabala bilund por malu calu thwon ruda, man leb ajuba biwero wer; kum pi bithwogre kud i langa, man kulo kud i ng’omngele.

⁷Man kwio m’urieny bidoko ni kut, ng’om mi rieu de bidoko ni kulo mi pi: i kabedo mir utho, ka ma givuto i ie, lum bibedo nuti ku kolo man usi.

⁸Man gengi bibedo kuca, ku yo, man jubilwong’e kumae, Yo mi leng’cwiny; gin m’ucido bikadhu kud i wie ngo; ento ebibedo ni ju ma juwarugi: juwoth, eyo jukusegu, bikier i ie ngo.

⁹Umvor moko bibedo kuca ngo, kadi yedi ma kwiny moko biidho i wie ngo; jubinwang’ugi kuca ngo; ento ju ma juwarugi biwotho kuca:

¹⁰e ju ma juwaru pa Yehova bidwogo, man gibibino ku wer ba Sayuni; man mutoro mi nja bibedo i wigi: e gibinwang’u mutoro kud anyong’a, e can ku gamucwiny bipiei woko.