Read Alur Isaya 4 Bible Online

Isaya 4 - Alur bible

Isaya 4

¹Man mon abiro gibimaku nico acel i ceng’ maeca, gibiwacu kumae, Wabicamu kwen mwa giwa, man wabikendo kendi mwa giwa: ndhu wek julwong’wa ku nyingi; kab lewic mwa cen.

²I ceng’ maeca jang Yehova bibedo leng’ man mi dwong’, man nying’ ng’om bibedo ber hai man mi bero ni ju ma giboth mir Israel.

³Man ebitimbre, nia ng’atu m’udong’ i Sayuni, ku ng’atu m’udong’ i Yerusalem, jubilwong’o leng’, en e ku ba dhanu ceke ma jukiewoi kind ju ma kwo i Yerusalem;

⁴nwang’u Rwoth ulwoko cilo mi nyig Sayuni cen, man eyweyo rimo mi Yerusalem kud i diere, ku tipo mi pokolembe, man ku tipo mi mac m’uwang’.

⁵Man Yehova biewio afuru ku yiro ma ku dieceng’, man rieny mi lebmac ma ku diewor; wi kabedo dho mi got Sayuni, man wi cokri pare; kum jubipedho girauma wi dwong’ne ceke.

⁶Man hema bibedo nuti ni tipo ma ku dieceng’ ni lietho, man ni kapondo man ni jambum ni wavuvu man ni koth.