Read Alur Isaya 40 Bible Online

Isaya 40 - Alur bible

Isaya 40

¹Wukwi cwiny, wukwi cwiny dhanu para, Mungu mu wacu.

²Wuyer lemjuk ni Yerusalem; wulwong’ i bang’e, nia ali pare thum, nia juweko kier pare, nia ejolo pi dubo pare wang’ ario kud i cing’ Yehova.

³ Dwand ng’atu moko m’ukok kumae, Wuyik yo pa Yehova i langa; wupot ng’omngele ni gengi ni Mungu mwa.

⁴Jubiting’o poga kubang’e kubang’e malu, man jubidwoko gudi kud ungulu gudi piny kubang’e kubang’e; man ka ma cung’ cung’ jubipoto, man ka ma tek ni pambu:

⁵E dwong’ pa Yehova binyuthre, man weg kum ceke binene karacelo; kum dhu Yehova yero maeni.

⁶Dwand ng’atu moko m’uwacu kumae, Lwong’. E ng’atu acel uwacu kumae, Alwong’ ang’o? Lwong’ kumae, Weg kum ceke en e lum, man berone ceke calu thiuboko m’i thim.

⁷Lum ner, man thiuboko kite rwinyo, kum yuyo pa Yehova kudho wie; andha dhanu en e lum.

⁸Lum ner, thiuboko kite rwinyo; ento lembe pa Mungu mwa bicungo mi nja.

⁹E in m’iyero rwonglembe ma ber ni Sayuni, idh malu wi got ma wiu; E in m’iyero rwonglembe ma ber ni Yerusalem, ting’ dwendi malu ku tego; ting’e malu, lworo kud unegi; wac ni adhura mi Yuda kumae, Nen, Mungu mu!

¹⁰Nen, Rwoth Yehova bibino calu jarukara, man bote bibimo pire: Nen, sukulia pare ni kude, man sukulia pare ni i wang’e.

¹¹Ebikwayu udul rombe pare calu jakwac, ebicoko nyithi rombe i bote, man ebiting’ogi i kore, man ebipeyo ju ma nyithindhgi nuti yo.

¹²Ng’a ma poro pi i die cinge, man ma poro polo ku jampor, ma ng’eyo mukero mi kwio m’i ng’om de, man ma poro gudi ku mukero, ungulu gudi de ku mukero?

¹³Ng’a ma telo wi Tipo pa Yehova, kadi ma japorlembe pare ma ponje?

¹⁴Giporo lembe giku ng’a, man ng’a ma ponje, ma ponje i yo mi pokolembe de, man ma ponje ku ng’eyong’ec, man ma nyutho ire yo mi ng’eyo lembe de?

¹⁵Nen, thek gi calu pi ma ton i agulu, man jukwanugi calu ng’ili utur m’i mukero: nen, eting’o cula calu gin ma nyathigi.

¹⁶Man Lebanon romo ngo mir awang’a, kadi limne de romo ngo mi lam m’awang’a.

¹⁷Thek ceke gi calu gin moko ngo i wang’e; ekwanugi calu gin moko ngo, man ma ie nanu.

¹⁸Wubilund poro Mungu kud ang’o? kadi wubipore kud ayi ma nedi?

¹⁹Ayi gin m’acwia, jatic uthiedhe, jabodho de mwone ku mola ma kwar, man ethiedho nyoro mi mola ma tar pire.

²⁰Ng’atu ma jacan hai ma copo nwang’u girathiera ma calu maeni ngo efoyo yen ma bitop ungo; eyenyo ire jatic ma riek kara eketh ayi gin m’acwia m’ang’ika malu, ma jubidaku ngo.

²¹Wung’eyo ngo? wuwinjo ngo? juyero iwu ngo ugambre i thekri? wung’eyo ngo ugambre i thekri mi thepiny mi ng’omi?

²²En e ng’atu m’ubedo malu wi twodri mi ng’om, e ju m’ubedo i ie gi calu usene; m’urieyo polo calu bongu m’ang’aba, man epedhogi calu hema ma jubedo i ie;

²³m’ujwigo judongomawijo ni gin moko ngo; m’udwoko jupoklembe m’i ng’om calu gin ma ie nanu.

²⁴Eyo, jupidhogi ngo; eyo, jucoyogi ngo; eyo, dundyen migi guro ulage i ng’om ungo: man ke ekudho wigi, e giner, man atido terogi cen calu soka.

²⁵Ka kumeno wubipora ku ng’a, ma nia abed rom kude? Ng’atu Maleng’ uwacu.

²⁶Wung’ai weng’wu malu, man wunen ng’atu m’ucwio maeni, m’uwodho udulgi woko ku wel; elwong’ogi ceke ku nying’gi; ku dit mi tego pare, man kum en e jatego i tego, acel de mbe m’urem.

²⁷Iwacu nenedi, E Yakobo, man iyero nenedi, E Israel, kumae, Yo para bedo apana ni Yehova, man pokolembe ma ira kadhu woko ku ba Mungu para?

²⁸Ing’eyo ngo? iwinjo ngo kumae? Mungu ma bedo rondo ku rondo, Yehova, Jacwi tung’ ng’om, voc ungo, kadi eol de ngo; ng’eyong’ec pare yenjre ngo.

²⁹Emio tego ni ju m’uvoc; man emedo tego ni ng’atu ma tego mbe kude.

³⁰Cil awia ma co gibivoc man gibiol, man awobi bipodho ma gwei:

³¹ento ju m’ukuro Yehova tego ma nyen bidwogo igi; gibituk ku bomb ma calu acur: gibiringo, e gibiol ungo; gibiwotho, e gibivoc ungo.