Read Alur Isaya 41 Bible Online

Isaya 41 - Alur bible

Isaya 41

¹Wubed ling’ i wang’a, E cula; man wek tego ma nyen udwog ni kodhidhanu: wek gicor ceng’ni; wek gilund giweci; wek wabin ceng’ni karacelo ba pokolembe.

²Ng’a m’uting’o ng’atu acel ku yo nyangu, m’elwong’o i bedopwe ba tiende? emio thek i wang’e, man eketho ebim wi ju m’ubimo; emiogi calu utur ni palamularu pare, calu soka m’ukoto ni atum pare.

³Eriemogi, man ekadhu museme, cil kud i yo ma fodi ewotho i ie ngo ku tiende.

⁴Ng’a m’uporo man m’utimo maeni, m’ulwong’o dhanum’utuk ugambre i thekri? An a Yehova, ma kwong’a, man ma cen, an a en.

⁵Cula neno, man lworo negogi; tung’ ng’om uyengre; gicoro ceng’ni, man gibino.

⁶Kubang’gi kubang’gi man ukonyo wadi; man kubang’gi kubang’gi man uwacu ni umin mire kumae, Bed ku tegocwiny ma ber.

⁷Kum kumeno jabodho mi bau udwoko cwiny jabodho mi mola ma kwar tek, man ng’atu ma poto piny ku nyondro ke udwoko cwiny ng’atu ma goyo pogi tek, m’ewacu pi mwono piny kumae, E ber; e emake ku musumali, kara kud eale.

⁸Ento in, Israel, ma jatic para, Yakobo m’afoyo, kodhi pa Ibrahim ma jarimba,

⁹in m’agamu kud i tung’ ng’om, man alwong’o kud i gunde, awacu de iri kumae, In i jatic para, afoi man abei woko ngo;

¹⁰lworo kud unegi, kum wanuti wakudi; cwinyi kud ung’abre, kum an a Mungu peri; abimio iri tego; eyo, abikonyi; eyo, abijengi ku cing’ ma yor acwic mi bedopwe para.

¹¹Nen, dhanu ceke ma kwinyo negogi i kumi jubinyayu lewic i wigi man jubing’abu cwinygi: ju m’uii kudi bibedo calu gin moko ngo, e gibirwinyo.

¹²Ibiyenyogi, man ibinwang’ugi ngo, en e ju ma wuii kugi: ju ma wukiedo kugi gibibedo calu gin moko ngo, man calu gin mananu.

¹³Kum an, Yehova, Mungu peri, abimaku cingi ma yor acwic, m’awacu ko iri kumae, Lworo kud unegi; abikonyi.

¹⁴Lworo kud unegwu, in i ukoko ma Yakobo, man wun wu dhanu mir Israel; abikonyi, Yehova wacu, man Jawarni en e Ng’atu Maleng’ mir Israel.

¹⁵Nen, adwoki ni jamfodo ma nyen ma bith ma ju lake; ibifodo gudi, man ibiodogi nyung’u nyung’u, man ibidwoko ungulu gudi calu cung’.

¹⁶Ibiyekogi, man yamu biduny kugi cen, atido de bikethogi; man anyong’a binegi ni kum Yehova, ibiyungri ni kum Ng’atu Maleng’ mir Israel.

¹⁷Jucan man jucanpiny giyenyo pi, man pi mbe, e lebgi tal kum rieu; an, a Yehova, abiloko igi lembe, an, a Mungu mir Israel, abikunogi ngo.

¹⁸Abiyabu kulo wi ka m’utingre m’ubedo mananu, man pi ma dhenyni i die poga; abidwoko langa ni kut mi pi, man ng’om m’uthwo ni kulo roi pi.

¹⁹Abiketho musonge i langa, man ulu, ku yen ma dundo ma nyinge col, man yen mi mo; abiketho sipre, ku sipre ma ithe boco, man upok karacelo i ng’omngele:

²⁰kara ginen, man ging’ei, igi pid de, man ging’ei thelembe karacelo, nia cing’ Yehova timo maeni, man Ng’atu Maleng’ mir Israel ucwio maeni.

²¹Wukel lembe mu, Yehova wacu; wuwodh thelembe mu ma tek, Ubimo pa Yakobo wacu.

²²Wek giwodhgi woko, man giyer iwa gin ma bitimbre: wuyer gin ma kwong’a, maram gibedo ko, kara wapar pigi, man wang’ei kajik migi; kadi wunyuth iwa gin ma bibino.

²³Wuyer pi gin ma bibino ma cen, kara wang’ei nia wu mungu: eyo, wutim ber, kadi wutim rac, kara cwinywa ng’abre, man wanene karacelo.

²⁴Nen, wun wu gin moko ngo, man tic mu en e mananu; ng’atu m’ufoyowu en e ginmajudagu.

²⁵Ating’o ng’atu acel malu ku yor ariwa ma malu, e ebino; ku yo ku wokceng’ ng’atu m’ulwong’o nyinga: man ebibino wi jubim calu wi ulobo, man calu jacwiagulu nyono ulobo.

²⁶Ng’a m’uyero maeni ugambre i thekri, kara wang’ei? man ma fodi nindo kutundo ngo, kara wawac kumae, En e atira? eyo, ng’atu moko mbe m’uyero, eyo, ng’atu moko mbe m’unyutho, eyo, ng’atu moko mbe m’uwinjo lembe peri.

²⁷An a ma kwong’a m’awacu ni Sayuni kumae, Nen, nengi; man abimio ng’atu m’ukelo rwonglembe ma ber ni Yerusalem.

²⁸E kinde m’aneno, ng’atu moko mbe ma nuti; cil i kindgi japorlembe mbe, ma copo loko lembe acel, kinde m’apenjogi.

²⁹Nen, kagi ceke, tic migi gin ma ie nanu man mananu; ayi gin m’acwia migi m’atwaga gi yamu man ang’abacwiny.