Read Alur Isaya 43 Bible Online

Isaya 43 - Alur bible

Isaya 43

¹Ento kawono Yehova m’ucwii wacu kumae, E Yakobo, man ng’atu m’ung’ini, E Israel: Lworo kud unegi, kum aweri; alwong’i ku nyingi, in i para.

²Kinde m’ikadhu kud i pi, wabibedo wakudi; man kud i kulo ma dit, gibimwonyi ngo: kinde m’iwotho kud i mac, ibiwang’ ungo, kadok lebmac de biliel i kumi ngo.

³Kum an a Yehova Mungu peri, Ng’atu Maleng’ mir Israel, Jalarni; amio Misiri calu jambwar peri, man Ethiopia ku Seba kakeri.

⁴Kum in i gin ma pire tek i wang’a, man mi yung, man ameri; ka kumeno abimio dhanu kakeri, man kodhidhanu ka kwo peri.

⁵Lworo kud unegi; kum wanuti wakudi: abigamu kodhini ku yo nyangu, man abicoki ku yo reto;

⁶abiwacu ni yor ariwa ma malu kumae, Wodhi; man ni yor ariwa ma piny kumae, Kud icer; kel wota ku bor, man nyiga kud i kajik mi ng’om;

⁷ku ba dhanu ceke m’ulwongre ku nyinga, man m’acwio pi dwong’ para, m’ang’ino, eyo, m’atimo.

⁸Wuwodh ju m’abinga ma wang’gi nuti, ku ju m’udhing’ ma ithgi nuti.

⁹Wek thek ceke cokre karacelo, man wek kodhidhanu cokri karacelo: ng’a m’i kindgi ma copo yero lembe maeni, man ma copo nyutho iwa gin ma kwong’a wek gikel jumulembe migi, kara jugony lembe m’i wigi; kadi wek giwinji, man giwac kumae, En e andha.

¹⁰Wun wu jumulembe para, Yehova wacu, man jatic para m’agoyo wie; kara wung’ei man wuyia, man wung’ei nia an a en: Mungu moko mbe ma jular jucwio ira, kadi ma bibedo nuti yo ng’eya.

¹¹An, ndhu an, an a Yehova; man jalar moko mbe m’umeda.

¹²Ayero, man abodho, man anyutho; e mungu ma jawirok moko mbe i kindwu: ka kumeno wun wu jumulembe para, Yehova wacu, man an a Mungu.

¹³Eyo, ugambre ma ceng’ nuti an a en; man ng’atu moko mbe ma copo bodho kud i cinga: abitimo tic, e ng’a ma copo cero maeni?

¹⁴Yehova, ma Jawar mu, Ng’atu Maleng’ mir Israel, uwacu kumae: Aoro kwenda i Babeli piwu, man abikelogi ceke piny calu jung’wec, en e Jukaldayo, i combo mir anyong’a migi.

¹⁵An a Yehova, ma Ng’atu Maleng’ mu, ma Jacwic mir Israel, m’Ubimo mu.

¹⁶Yehova, m’utimo yor i nam, man yor i pi ma dit; uwacu kumae,

¹⁷en e ng’atu m’uwodho magali ku riuni, man njuru asikari ku ng’atu ma jarukara (givuto piny karacelo, gibiai ungo; gimbe, junegogi calu bonguthala):

¹⁸Kud wupoi pi gin ma kwong’a, kadok pi gin ma con de kud wupidi.

¹⁹Nen, abitimo gin ma nyen; kawono ebiloth; wubing’eye ngo? abitimo yo cil i yamba, man kulo ma dit i ng’omngele.

²⁰Yedi m’i thim biyunga, utho ku udo kum amio pi i yamba, man kulo ma dit i ng’omngele kara ami giramadha ni dhanu para, gi ju m’agoyo wigi,

²¹dhanu m’ang’ino pira gira, kara ginyuth pak para.

²²Ento ilwong’a ngo, E Yakobo; ento iol ni kuma, E Israel.

²³Ikelo ira kum rombe peri ngo ni lam m’awang’a; kadi ayunga de iyunga ngo ku lam peri. Anuri ngo ku lam mi mogo, kadi aoli de ngo kud udok ma ng’wice ng’ar.

²⁴Ing’iewo ira thiang’ ungo ku sente, kadi iyeng’a de ngo ku mo mi lam peri; ento inura ku dubo peri, iola ku kier peri.

²⁵An, en e an, an a ng’atu m’uyweyo gondri peri woko pira gira; e abipoi kum dubo peri ngo.

²⁶Poya; wek wapor lembe karacelo: wodh lembe peri, kara jugony lembe m’i wii.

²⁷Kwaru ma kwong’a dubo, man juponji peri gidubo ira.

²⁸Ka kumeno abicido judongomawijo mi kamaleng’; man abidwoko Yakobo ni kwong’, man Israel ni cac.