Read Alur Isaya 47 Bible Online

Isaya 47 - Alur bible

Isaya 47

¹Lor piny, man ibed i utur, i Nyababeli ma sumba; bed i ng’om m’umbe komker, E nya Jukaldayo: kum jubilwong’i yom man nwenwe kendo ngo.

²Gam kidi rego, man ireg mogo; kab bongu mi wang’ peri woko, wany bongu m’aywaya, yab wi tiendi, kadh kud i kulo ma dit.

³Muneru peri jubiyabu, eyo, lewic peri binen: abiculo kwor, man abiweko ng’atu moko ngo.

⁴Jawar mwa, nyinge Yehova mir udul, Ng’atu Maleng’ mir Israel.

⁵Bed ling’, man imond i mudho, E nya Jukaldayo; kum jubilwong’i mugole mi ker kendo ngo.

⁶Kwinyo nega kum dhanu para, acido aba para, man amiogi i cingi: kisa negi ngo i kumgi; iketho mberembere peri pek hai wi ju m’uti.

⁷Man iwacu kumae, Abibedo mugole nja; ketho nia iketho cwinyi ngo kum gin maeni kadok kajik ma cenne de ipoi pire ngo.

⁸Ka kumeno kawono winj maeni, in m’imiri ni anyong’a, m’ibedo ma cwinyi ringo ngo, m’iwacu yo i adundeni kumae, Anuti, man ng’atu moko mbe m’umeda; abibedo calu dhaku ma cware tho ngo, kadok nek mi nyithindho de abing’eyo ngo:

⁹ento gin ario maeni biwok i kumi i nindo ma nyathigi i ceng’ acel, nek mi nyithindho, man bedo dhaku ma cware tho; gibibino i wii i mukero migi ma pong’, i udul mi lamu bila peri, man i dit mir ajoga peri.

¹⁰Kum igeno dubo peri; iwacu kumae, Ng’atu moko mbe m’unena; rieko peri man ng’eyong’ec peri, eloko pidoi; man iwacu yor i adundeni kumae, Anuti, man ng’atu moko mbe m’umeda.

¹¹Ka kumeno lem ma rac biwok i kumi; ibing’eyo rupinje ngo: man lem ma rac bipodho i wii; ibicopo core cen ungo: e nyoth bibino i wii pio pio, m’ing’eyo ngo.

¹²Cung kawono kud ajoga peri, man kud udul lamu bila peri, m’imuli i ie ugambre i aradu peri; tek lembe bibedo miero iri, tek icopo dwoko dhanu tipo.

¹³Iol i udul lembapora peri: kawono wek jurieko m’i polo, ku jung’i polo, man jung’ei lembe ma ku ba dwi ku ba dwi, gicung malu, man gibodhi ni gin ma biwok i wii.

¹⁴Nen, gibibedo calu soka; mac biwang’ugi; gibibodhri gigi ni tego mi lebmac ungo: ebibedo cukmac mi muro kum ungo, kadi mac ma jubedo i wang’e ngo.

¹⁵Gin m’imuli i ie bibedo iri kumeni: ju ma giloko kuloka kudi ugambre i aradu peri gibigondri kubang’gi kubang’gi ng’atuman i yo pare gire; ng’atu moko bibedo mbe m’ubodhi.