Read Alur Isaya 48 Bible Online

Isaya 48 - Alur bible

Isaya 48

¹Wuwinj maeni, E ot pa Yakobo, m’ulwongre ku nying’ Israel, man m’uai kud i pi mi Yuda; m’ukwong’o kwong’ ku nying’ Yehova, man m’uweco pi Mungu mir Israel, ento ku lemandha ngo, kadi ku bedopwe de ngo

²(kum gilwongri gigi mir adhura ma leng’, man gijengri gigi kum Mungu mir Israel; nyinge Yehova mir udul):

³ayero gin ma kwong’a ugambre con; eyo, giwok woko kud i dhoga, man anyuthogi: atimogi pio, e gitimbri.

⁴Kum ang’eyo nia in i udhuko, man ng’uti en e ler mi nyunyu, man ternyimi mola;

⁵ka kumeno ayero maeni iri ugambre con; ma fodi etimbre ngo anyutho iri; imaru wacu kumae, mungu m’araga para timogi, man ayi gin m’acwia para m’ang’ika, kud ayi gin m’acwia para m’atwaga, ung’ologi.

⁶Iwinjo maeni; nen maeni ceke; man wun, wubiyero maeni ngo? anyutho iri gin ma nyen ugambre eni, en e gin m’upandre, ma fodi ing’eyo ngo.

⁷Jucwiogi kawono, man ugambre con ungo; e ma fodi ceng’ maeni kuwok ungo iwinjogi ngo; imaru wacu kumae, Nen, ang’eyogi.

⁸Eyo, iwinjo ngo; eyo, ing’eyo ngo; eyo, ugambre nindo ma con ithi bedo ayaba ngo: kum ang’eyo nia itimo kud abombi dit, man julwong’i won gondri ugambre i ic.

⁹Kum abikoweko ng’ecwiny para tundu pi nyinga, man abicera piri pi pak para, kara kud akebi woko.

¹⁰Nen, adwoki leng’, ento calu mola ma tar ungo; amuli i uka mi masendi.

¹¹Pira gira, pira gira, abitimo maeni; kum jucid nyinga pir ang’o? man abimio dwong’ para ni ng’atu mange ngo.

¹²Wuwinja, E Yakobo, man Israel para ma julwong’o: an a en; an a ma kwong’a, an a ma cen bende.

¹³Eyo, cinga ketho theng’om, man cinga ma yor acwic urieyo polo: kinde m’alwong’ogi, gicungo karacelo.

¹⁴Wucokru giwu, kewu ceke, man wuwinji; ng’a m’i kindgi m’uyero gin maeni? Ng’atu ma Yehova maru bitimo gin m’emaru wi Babeli, man bote bibedo wi Jukaldayo.

¹⁵An, en e an, ayero; eyo, alwong’e; akele, man ebiketho yo pare bedo miero.

¹⁶Wubin ceng’ni an, wuwinj maeni; ugambre i thangambere ayero mung’ mung’ ungo; ugambre i nindo m’enuti, ani keca: man kawono Rwoth Yehova ora, man Tipo pare.

¹⁷Yehova, Jawarni, Ng’atu Maleng’ mir Israel uwacu kumae: An a Yehova Mungu peri, m’aponji ni kuloka, m’atelo wii kud i yo ma maku iwoth i ie.

¹⁸A tek iwinjo lembang’ola para mire! kuno di kwiocwiny peri bedo calu kulo ma dit, man kuno di bedopwe peri bedo calu mukura mi nam:

¹⁹kuno di kodhini de bedo calu kwio, nyikwei m’i ii bedo calu nying’ kwione: kuno di nyinge kabre woko ngo kadi unyothre de i wang’a.

²⁰Wuai kud i Babeli, wuring Jukaldayo; wuyer maeni ku dwal mi wer, wuwac maeni, wuyere cil kum kajik mi ng’om: wuwac kumae, Yehova waru jatic pare ma Yakobo.

²¹E rieu negogi ngo kinde m’etelo wigi kud i ng’omngele; eketho pi thwogre kud i cana igi; eng’enyo cana bende, e pi thwogre woko.

²²Yehova wacu kumae, Kwiocwiny umbe ni judubo.