Read Alur Isaya 5 Bible Online

Isaya 5 - Alur bible

Isaya 5

¹Wek awer wer pa jamerna ni jamerna pi podho mir ulok pare. Jamerna bedo ku podho mir ulok wi ungulu got ma ber hai:

²man efure, ecoko kidi de kud i ie, man epidhe ku yendulok ma cu, e egomo odtra i diere, e eroko kabipigulok bende i ie: man egeno nia ebiwodho nyingulok, e ecego nyingulok m’i thim.

³E kawono, e ju m’ubedo i Yerusalem man dhanu mi Yuda, akwayuwu, wupok lembe i kindwa waku podho mir ulok para.

⁴Jucopo timo ang’o mange i podho mir ulok para, m’akatimo an ungo i ie? pirang’o, kinde m’ageno nia ebicego nyingulok, ecego nyingulok m’i thimi?

⁵E kawono abiyero iwu maram abitimo ko kum podho mir ulok para: abikabu ararane, e jubicame; abirwombo gange piny, e jubinyone:

⁶e abidwoke ni uvuru; jubilwere ngo kadi afura de ngo; ento ucok kud ukudho bitwi: abing’olo ni afuru bende kara ku gikonj koth moko i wie.

⁷Kum podho mir ulok pa Yehova mir udul en e ot mir Israel, man dhanu mi Yuda gi yen m’apidha pare ma ber: man egeno pokolembe, ento, nen, dim; egeno bedopwe, ento, nen, ywak.

⁸Can ni ju ma eoro ot kum ot wadi, ma ketho podho kum podho wadi, maram kinde moko mbe ma dong’, e juketho wubed kendwu i die ng’om!

⁹I itha Yehova mir udul uwacu kumae, Andha udi dupa jubidwoko ni uvuru, udi ma dongo ma beco de, gibibedo ma dhanu mbe i ie.

¹⁰Kum podho mir ulok mi dakutielo dak ang’wen bicego pigulok ma pong’o dhwong’o acel, man kodhicam ma dero acel bieek katoko acel.

¹¹Can ni ju ma ai pir kugweno, kara gilub tok giramadha ma lake tek; ma gigalu hai ku diewor, maram pigulok mero kogi!

¹²Man adungu ku dongo, man umbukulumbu kud usegu, man pigulok, gini i agba migi; ento giparu pi tic pa Yehova ngo, kadok giratima mi cinge de giparu pire ngo.

¹³Ka kumeno dhanu para gicrdho i ng’eca kum ng’eyong’ec m’umbe; man dhanu migi mi yung givoc ku kec, man udul migi gisendri ku rieu.

¹⁴Ka kumeno liel yabu avane, man eng’amu dhoge ma porne mbe; e dwong’ migi, kud udul migi, man yakni migi, ku ng’atu m’anyong’a nege i kindgi, giloro piny i ie.

¹⁵E ng’atu ma sai junyono piny, man ng’atu ma dwong’ jujwigo, man wang’ ju m’utingri jujwigo:

¹⁶ento Yehova mir udul judodo i pokolembe, man Mungu ma Ng’atu Maleng’ udwokre leng’ i bedopwe.

¹⁷E nyithi rombe bilund camu calu i kakwae migi, man kar uvuru mi ju m’ucwe juwoth bicamu.

¹⁸Can wi ju m’upeyo kier ku thondh ndra, man dubo calu ku uno mi magali;

¹⁹m’uwacu kumae, Wek etim pio, wek edhul tic pare, kara wanene; man wek lembapora pa Ng’atu Maleng’ mir Israel ucor ceng’ni man ebin, kara wang’ei maeni!

²⁰Can ni ju ma lwong’o dubo ya ber, man gin ma ber ya dubo; ma ketho mudho ni der, man der ni mudho; ma ketho gin ma kec ni gin ma mit, man gin ma mit ni gin ma kec!

²¹Can ni ju ma riek i wang’gi gigi, man riu i wang’gi gigi!

²²Can ni ju ma gi jutego mi madhu pigulok, man dhanu ma jutego mi jebo giramadha ma lake tek;

²³man ni ju ma gonyo lembe ma wi judubo ni kum jamblembe, man ma kabu bedopwe pa won bedopwe woko kud i bang’e!

²⁴Ka kumeno calu lebmac wang’u soka, man calu lum m’uthwo rungre i lebmac, e ulaggi bibedo kumeca calu gin m’utop, man thiugi biduny calu utur; kum gikwero cik pa Yehova mir udul, man gicayu lembe pa Ng’atu Maleng’ mir Israel.

²⁵Ka kumeno ng’ecwiny pa Yehova opo kum dhanu pare, man erieyo cinge i kumgi, man egoyogi; e gudi yengre, man avujgi bedo calu susu i die gengi. Kadok maeni ceke timbre ng’ecwiny pare lokre cen ungo, ento cinge bedo arieya asu.

²⁶Man ebiting’o abera ni thek ma ni bor, man ebilwong’ogi ku lwio kud i tung’ ng’om; man, nen, gibibino pio ku ng’wec.

²⁷Ng’atu moko mbe i kindgi ma biol kadi ma bikier; ng’atu moko mbe ma binuro kadi ma binindo; kadok thondhpiergi de bigony ungo, kadok ramak mi wara migi de bitur ungo:

²⁸ma leb athero migi bith, atum migi ceke de bedo agoma; tiend riuni migi jubiwacu nyo kidi ma tek, man ukobre migi calu atido:

²⁹rundo migi bibedo calu pa min umvor, gibirundo calu nyithindh umvor; eyo, gibirundo, man gibimaku ayeki, e gibitere cen museme, man ng’atu moko mbe ma bibedo nuti m’ubodhgi.

³⁰E gibiwoi i kumgi i ceng’ maeca calu woi mi nam: man tek ng’atu moko neno ba ng’om, nen, mudho ku lem ma tek; man der ucido i afurune.