Read Alur Isaya 50 Bible Online

Isaya 50 - Alur bible

Isaya 50

¹Yehova wacu kumae, Waraga mi riem pa meru ni kani, m’arieme kudo? kadi ang’iewowuba jami banja para ma kani? Nen, jung’iewowu kum kier mu, man juriemo meru kum gondri mu.

²Pirang’o, kinde m’abino, ng’atu moko mbe? kinde m’alwong’o, ng’atu moko mbe m’uyi? Cinga jik ajika, ma nia ecopo waru ngo? kadi tegona mbe m’abodh ko? Nen, ni kum juk para adwono nam, man adwoko kulo ma dit ni langa: rec migi ng’wi, kum pi mbe, man githo ni rieu.

³Aronyo polo ku piny ma col, man aketho gonia ni girauma migi.

⁴Rwoth Yehova mio ira leb mi ju ma juponjo, kara ang’ei maram jujengo ko ng’atu m’uol ku lembe: eceu ku ba rupiny ku ba rupiny, ecewo itha kara uwinj calu julub ma juponjogi.

⁵Rwoth Yehova yabu itha, man ajai ungo, kadi alokra cen de ngo.

⁶Amio ng’eya ni jugoc, man limba ni jufudh yir; apanu wang’a ngo ni lewic ku ng’ulo lau.

⁷Kum Rwoth Yehova bikonya; ka kumeno cwinya ng’abre ngo: ka kumeno aketho wang’a calu kidi ma tek, e ang’eyo nia jubinyayu lewic i wia ngo.

⁸Ng’atu m’ugonyo lembe m’i wia ni ceng’ni; ng’a ma wabi-ii wakude? wek waeung karacelo: ng’a ma jasendna? wek ebin ceng’ni i bang’a.

⁹Nen, Rwoth Yehova bikonya; ng’a ma bigonja? nen, kagi ceke gibiti calu kendi; abirbir bicamugi.

¹⁰Ng’a m’i kindwu m’ulworo Yehova, m’uworo dwand jatic pare? ng’atu m’uwotho i mudho, man der umbe kude, wek egen nying’ Yehova, man ejeng’ kum Mungu pare.

¹¹Nen, kewu ceke ma wucwinyo mac, ma wutwiru giwu ku dhumac; wuwoth i lebmac mi mac mu, man kind dhumac ma wucwinyo. Wubibedo ku maeni m’i cinga; wubivuto piny i can.