Read Alur Isaya 53 Bible Online

Isaya 53 - Alur bible

Isaya 53

¹Ng’a m’uyio rwonglembe mwa? man bot Yehova nyuthre ni ng’a?

²Kum edongo i wang’e calu girapidha ma ng’ic, man calu ulag piny kud i ng’om m’uthwo: kite kadi berone de mbe; man kinde ma wanene, bero moko mbe ma nia wayenye.

³Dhanu caye, man gikwere; en e dhanu mi can, man eng’io ku masendi: man jucaye calu ng’atu ma dhanu panu wang’gi ni kume; e wakwane ni gin moko ngo.

⁴Andha eyeyo tho mwa, man eyeyo can mwa; ento wanene ma juredhe, jugoye ni kum Mungu, man jusende.

⁵Ento jutong’o lero i kume pi gondri mwa, junyayu rem i kume kum kier mwa; ponji mi kwiocwiny mwa ni i wie; man wacangu ni kum goc pare.

⁶Kawa ceke wakier calu rombe; wakier kubang’wa kubang’wa ng’atuman i yoje gire man i yoje gire; man Yehova ketho kier mwa ceke i wie.

⁷ Jusende, ento kinde ma jusende ealu dhoge ngo; calu nyathi rombo ma jupeyo mi nek, man calu rombe ma i wang’ junyar yuke bedo ling’, e ealu dhoge ngo.

⁸Jukabe cen ni kum masendi ku pokolembe; man pi dhanum’utuk pare, ng’a m’i kindgi m’uparu nia jukabe woko kud i ng’om mi ju ma kwo pi gondri mi dhanu para ma maku goc upodh i kumgi?

⁹E gitimo liel pare karacelo ku judubo, man karacelo ku jalonyo i tho pare; kadok etimo rop moko ngo, kadok abombi moko de mbe i dhoge.

¹⁰Ento ebedo ber ni Yehova ya enyai rem i kume; enyayu can i kume: kinde m’ibidwoko ng’eyong’ec pare ni lam mi dubo, ebineno kodhi pare, ebimedo nindo pare, man gin ma nyayu mutoro i Yehova bibedo miero i cinge.

¹¹Ebineno sendri mi ng’eyong’ec pare, e cwinye bikwio: ni kum ng’eyong’ec pare gire jatic para ma pwe bigonyo lembe ma wi dhanu dupa; man ebiyeyo kier migi.

¹²Ka kumeno abipoko ire makapiny karacelo ku ju ma dwong’, man ebipoko ayeki karacelo ku jurukara; kum ekonjo ng’eyong’ec pare ni tho, man jukwane karacelo ku weg gondri: ento eyeyo dubo mi dhanu dupa, man ekwayu kwac pi weg gondri.