Read Alur Isaya 54 Bible Online

Isaya 54 - Alur bible

Isaya 54

¹Wer, E mugumba, in m’inyol ungo; moc ku wer, man ikok ma tek, in m’isendri ngo ku nyodo: kum nyithindho pa ng’atu ma kende gi dupa ma sagu nyithindho pa dhaku ma jugamu, Yehova wacu.

²Med ka hema peri, man wek jutel i bongu m’ang’aba mi kabedo peri; kud ikwer: dwok thol peri bor, man idwok gute peri tek.

³Kum ibimoiri mba yo ku cing’ ma yor acwic man ma yor acam; man kodhini bimwonyo thek, man gibiketho adhura m’uvuru bedo ku dhanu.

⁴Lworo kud unegi; kum lewic binegi ngo: kadok cwinyi de kud ung’abre; kum jubinyayu lewic i wii ngo: kum wii biwil kum lewic mir aradu peri; man ibipoi kendo ngo pi cac mi bedo mbe co peri.

⁵Kum Jacwic peri en e nico peri; nyinge Yehova mir udul: man Ng’atu Maleng’ mir Israel en e Jawarni; jubilwong’e Mungu mi ng’om ngung’.

⁶Kum Yehova lwong’i calu dhaku ma julandu ma can unego cwinye de, en e dhaku mir aradu, kinde ma jucore cen, Mungu peri wacu.

⁷Kum aweki mi nindo ma nyanok; ento abicoki ku kisa ma dit.

⁸I kwinyo ma nok apanu wang’a iri i nindo ma nyathigi; ento kisa binega i kumi ku mer mi bero mi nja, Yehova ma Jawarni wacu.

⁹Kum maeni en e calu pi pa Noa ira; kum calu akwong’o nia pi pa Noa biumo ng’om kendo ngo, e akwong’o nia kwinyo binega kendo ngo i kumi kumeca, kadi ajuka de abijuki ngo.

¹⁰Kum gudi copo ai, man jucopo kabu ungulu gudi; ento mer mi bero para biai kud i beng’i ngo, kadok lembariba para mi kwiocwiny de jubikabu ngo, Yehova ma kisa nege i kumi wacu.

¹¹E in ma jusendi, ma juting’i ku wavuvu, ma jujuki ngo, nen, abiketho kitpiny ma ber kum kidi peri, man abiketho thepiny peri ku kidi ma tek ma ie nen uluga.

¹²Man abitimo usimbru udi peri ku kidi ma kwar, man dhugang’ peri ku kidi ma kwar ma tek, man jambruko peri ceke ku kidi ma pire tek.

¹³Man Yehova biponjo nyithindho peri ceke; man kwiocwiny mi nyithindho peri bibedo dit.

¹⁴Jubiketho icungo i bedopwe: ibibedo bor ku masendi, kum lworo binegi ngo; man ni ndiri, kum ebibino ceng’ni i vuti ngo.

¹⁵Nen, gicopo cokri karacelo, ento ni kuma ngo: dhanu ma tek bicokri karacelo i kumi bipodho ni kumi.

¹⁶Nen, acwio won uka ma kudho mac mi cukmac, man ma thiedho jamtic mi tic pare; man acwio janyoth kara unyothi.

¹⁷Jambali moko mbe ma jucwio i kumi ma bibedo miero; man ibigonjo leb ceke kubang’e kubang’e ma biai i kumi i pokolembe. Maeni en e aba mi jutic pa Yehova, man bedopwe migi m’uai i bang’a, Yehova wacu.