Read Alur Isaya 55 Bible Online

Isaya 55 - Alur bible

Isaya 55

¹Ae, ku ba dhanu ceke ng’atu ma rieu benege, wubin ba pi, man ng’atu ma sente mbe kude; wubin, wung’ieu, man wucam; eyo, wubin, wung’ieu pigulok ku cak ma sente mbe man welpiny de mbe.

²Pirang’o wulalu sente wi gin ma kwen ungo? man tic mu wi gin ma yeng’o jo ngo? wuwinj cu i bang’a, man wucam gin ma ber, man wek anyong’a neg ng’eyong’ec mu ku mio.

³Wucik ithwu, man wubin i bang’a; wuwinji, e ng’eyong’ec mu bibedo kwo: man abitimo lembariba mi nja kudu, en e kisa mandha pa Daudi.

⁴Nen, amie ni mulembe ni kodhidhanu, jatelwic man jego ni kodhidhanu.

⁵Nen, ibilwong’o thek m’ing’eyo ngo; man thek m’ung’ei ngo biringo i beng’i, ni kum Yehova Mungu peri, man ni kum Ng’atu Maleng’ mir Israel; kum eyungi.

⁶Wuyeny Yehova kinde m’enwangre; wulwong’e kinde m’eni ceng’ni:

⁷dong’ jadubo wek yo pare, man won gondri pidoic pare; man wek edwog ba Yehova, e kisa binege i kume; man ba Mungu mwa, kum ebiweko ire ma gwei.

⁸Kum pidoic para en e pidoic mu ngo, kadok yo mu de en e yo para ngo, Yehova wacu.

⁹Kum calu polo bedo malu ma sagu ng’om e yo para ni malu ma sagu yo mu kumeno, man pidoic para ni malu ma sagu pidoic mu.

¹⁰Kum calu koth uai kud i polo man pei, man gidok kuca ngo, ento giyomo ng’om, man etwio piny man ekudo de, emio kodhi de ni jacoi kodhi man kwen ni jacam;

¹¹e lembe para m’uai kud i dhoga de bibedo kumeca: ebidwogo i bang’a mananu ngo, ento ebitimo gin m’ayenyo, man ebibedo miero kum gin m’aore pire.

¹²Kum wubiwok woko ku mutoro, man jubitelo wiwu ku kwiocwiny: gudi kud ungulu gudi bimoc ku wer i weng’wu; e yen ceke m’i thim biteng’o cing’gi.

¹³Sipre bitwi kar ukudho; man yen m’adundo bitwi kar ucok: e ebibedo ni Yehova ni nying’, ni giranyutha mi nja ma jubithumo woko ngo.