Read Alur Isaya 56 Bible Online

Isaya 56 - Alur bible

Isaya 56

¹Yehova wacu kumae, Wugwok pokolembe, man wutim bedopwe; kum both para ni ceng’ni bino, man judhingo nyutho bedopwe para.

²Mugisa ni ng’atu m’utimo maeni, man ni wod dhanu m’umoko i kume; m’ugwoko ceng’ sabatu kum eide, man m’ucero cinge ku timo gin moko ma rac.

³Kadi kud wuyi jawirok, m’uribre gire ba Yehova, uyer, uwac kumae, Yehova bikoya ku dhanu pare andha; kadi kud wuyi jamugumba wac kumae, Nen, an a yen m’uthwo.

⁴Kum Yehova yero pi jumugumba m’ugwoko ceng’ sabatu para, man m’ufoyo gin ma nyayu mutoro i ia, man m’umoko kum lembariba para kumae:

⁵Abimio igi nying’ mi poi i ot para man yor i gang’kidi para ma sagu nyithindho ma co ku nyithindho ma nyir; abimio igi nying’ mi nja, ma bikabre woko ngo.

⁶Man juwirok bende m’uribre gigi ba Yehova, kara gitim ire, man kara gimar nying’ Yehova, kara gibed jutic pare, ku ba dhanu ku ba dhanu m’ukwiro ceng’ sabatu kum eide, man m’umoko kum lembariba para;

⁷gin nini abiterogi ba got ma leng’ para, man abinyayu mutoro i igi i ot mi rwo para: lam m’awang’a migi ku lam migi biyire wi pemblam para; kum jubilwong’o ot para ot mi rwo ni kodhidhanu ceke.

⁸Rwoth Yehova, m’ucoko ju ma jubayu mir Israel, uwacu kumae, Fodi abicoko jumange i bang’e, medo jupare ma dhe ma jucoko.

⁹Wu yedi ceke m’i thim, wubin kara wucam, eyo, wu yedi ceke m’i luli.

¹⁰Jukur pare gin abinga, kagi ceke ng’eyong’ec umbe kugi; kagi ceke gi gwok m’ajuba, gicopo gbuyo ngo; ma gibeleko lek, givuto piny, gimaru nuro.

¹¹Eyo, gwok gi jungiri, gicopo bedo ku ma romo gi ngo; man maeni gi jukwac ma copo ng’eyo ngo: kagi ceke gilokri ng’atuman i yo pare ma dhe, kubang’gi kubang’gi ng’atuman ba kuloka pare, ku ba thepiny ang’wen.

¹²Wubin, giwacu, abikelo pigulok, man wabiyengra giwa ku giramadha ma lake tek; e urwo bibedo calu ceng’ maeni, ceng’ ma dit ma sagu mukero.