Read Alur Isaya 59 Bible Online

Isaya 59 - Alur bible

Isaya 59

¹Nen, cing’ Yehova jik ungo, ma nia ecopo bodho ngo; kadok ithe de pek ungo, ma nia ecopo winjo ngo:

²ento kier mu poko kindwu ku Mungu mu, man dubo mu panu wang’e iwu, ketho nia ebiwinjo ngo.

³Kum cingwu cido ku rimo, man lwetwuku kier; dendhogwu yero ndra, lebwu mung’ ku lem ma rac.

⁴Ng’atu moko mbe ma kelo lembe i titi i bedopwe, man ng’atu moko mbe ma piemo lembe i lemandha, gigeno gin ma ie nanu, man giyero lemndra; gigamu ic mi lem ma rac, man ginyolo kier.

⁵Gialu tong’ bunyo, man gicwio od avoiceng’: ng’atu m’ucamu kum tonge tho; man maeno ma junyono ewok woko ni uting’kwodo.

⁶Odgi bidoko ni kendi ngo, kadi gibiumbri ku tic migi de ngo: tic migi tic mi kier, man tic mi rop ni i cing’gi.

⁷Tiendgi ringo ba lem ma rac, man gitimo pio kara gicwir rimo m’umbe dubo: pidoic migi en e pidoic mi kier; uvuru man nyoth ni i yo migi.

⁸Yo mi kwiocwiny ging’eyo ngo; man pokolembe mbe i woth migi: gitimo igi yo m’ugondre; ng’atu ma tek uwotho i ie ng’eyo kwiocwiny ungo.

⁹Ka kumeno pokolembe ni bor kudwa, kadok bedopwe de rubowa ngo: wakio der, ento, nen, mudho; wakio rienypiny, ento wawotho i piny ma col.

¹⁰Wamulo gang’kidi calu abinga; eyo, wamulo piny calu ju ma wang’gi mbe: wakier ku dieceng’ calu i yuthopiny; wabedo calu avu i kind dhanu ma tek.

¹¹Kawa ceke warundo calu wai, man wacur acura calu akuru: wakio pokolembe, ento moko mbe; wakio both, ento eni bor kudwa.

¹²Kum gondri mwa gimedri i weng’i man dubo mwa tuco wiwa; kum gondri mwa ni karacelo kudwa, man kier mwa, wang’eyogi;

¹³ma wabegondra man wabekwero Yehova, ku lokri cen ku lubo Mungu mwa, ma wabeyero pi masendi ku jai, ma wabeporo man wabeweco lemndra kud i cwiny.

¹⁴E pokolembe lokre cen i ng’ec, man bedopwe cungo bor cen; kum lemandha podho i gengi, man lem m’atira copo mondo ngo.

¹⁵Eyo, lemandha rem; man ng’atu m’uweko dubo edwokre gire ni amaci. E Yehova neno maeni, man enyayu ng’ecwiny i ie kum pokolembe mbe.

¹⁶Man eneno nia ng’atu moko mbe, e ie wang’ lii kum jakindjo mbe: ka kumeno bote ma dhe kelo both ire; man bedopwe pare, ejenge.

¹⁷Man eronyo bedopwe calu asi, ku jamgwok mi both i wie; man eronyo bongu mi culokwor ni kendi, man eronjre ku ngiri calu kanzu.

¹⁸Calku giratima migi, ebiculo kumeca, kwinyo ni jusendne, cul nijudegine; ebidwoko cul ni cula.

¹⁹Kum kumeno gibilworo nying’ Yehova gambre yo reto, man dwong’ pare gambre i wokceng’. Ka jadegi bino calu kulo m’utuk, Tipo pa Yehova biketho eringo.

²⁰Man Jawar bibino Sayuni, man ba ju m’ulokri ku ba gondri i Yakobo, Yehova wacu.

²¹Man pira, maeni lembariba para ma wakugi, Yehova wacu: Tipo para ma ni i wii, man lembe para m’aketho i dhogi, biai kud i dhogi ngo, kadi kud i dhu kodhini de ngo, kadi kud i dhu kodhi mi kodhini de ngo, Yehova wacu, ugambre kawono cil nja.