Read Alur Isaya 61 Bible Online

Isaya 61 - Alur bible

Isaya 61

¹ Tipo pa Rwoth Yehova ni i wia; kum Yehova wira kara ayer rwonglembe ma ber ni ju ma mol; eora kara acang cwiny ju m’utur, kara ayer pi gony ni ng’eca, man pi yabu dhu kol ni ju ma jutwio;

²kara ayer pi rundi mi bero pa Yehova, man ceng’ mi culokwor pa Mungu mwa; kara ajuk dhanu ceke m’uywak;

³kara ang’ol ni ju m’uywak i Sayuni, kara ami igi jambruko ka vuru, man mo mi mutoro ka ywak, man kendi mi pak kar adieng’acwiny; kara julwong’gi yen mi bedopwe, girapidha pa Yehova, kara juyunge.

⁴E gibigomo uvuru ma con, man gibiting’o ka m’unyothre ma kwong’a, man gibiyiko adhura m’umor, ka m’unyothre ni dhanum’utuk dupa.

⁵Man juwirok bicungo man gibikwayu udul rombe mu, man juwirok bibedo ni jufur mu ku julwer kum ulok mu.

⁶Ento jubilwong’owu julam pa Yehova; dhanu bilwong’owu jutim pa Mungu mwa: wubicamu lonyo mi thek, man wubilulu giwu ni kum dwong’ migi.

⁷Wubibedo ku piny wang’ ario ka lewic mu; man anyong’a binegogi ni kum makapiny migi ka cac: ka kumeno gibibedo ku piny wang’ ario i ng’om migi; mutoro mi nja bibedo igi.

⁸Kum an, an a Yehova, amaru pokolembe, adagu ayeki ku kier; man abimio cul migi igi i lemandha, man abitimo lembariba mi nja kugi.

⁹Man jubing’eyo kodhigi i kind thek, man nyikwaigi i kind kodhidhanu: dhanu ceke m’unenogi bing’eyogi, nia gi kodhi ma Yehova mio mugisa igi.

¹⁰Anyong’a binega dit ni kum Yehova, anyong’a binego ng’eyong’ec para ni kum Mungu para; kum eronya ku kendi mi both, euma ku kanzu mi bedopwe, calu won ambadha rukre gire ku jambruko, man calu mugole rukre gire ku jambruko pare.

¹¹Kum calu ng’om twio kudone, man calu podho ketho gin ma jucoyo i ie loth; e Rwoth Yehova biketho bedopwe ku pak loth kumeca i wang’ thek ceke.